Wir heinrich der Reuzze vogt von Plauen fur vns vnser Erbn vnd nachkomen Bekennen vnd tun kunt offenlich mit disem briue allen
den die yn sehen oder horen lesen Das wir mit wolbedachtem mute mit rate vnser freunde vnd mit rechter wizzen verkoufft haben rechtlich
vnd redlich in einem rechten keuffe dem Allerdurchleuchtigistem fursten vnd herren hern karl Romischem keiser zu allen zeiten merer des
Reichs vnd kunig zu Behem als einem kunige zu Behem seinen Erbn vnd nachkomen kunigen zu Behem vnd der Cronen desselbn kunigreichs zu
Behem vnser Stat Reichenbach Diroßthow ober Reichenbach Cunratsdorf Brunne vnd Schonbach dorffer die darzu gehoren die vnser Veterlich
Erbe waren mit allen gulden gelden zollen nuzen gerichten herscheften manscheften Ekkern holzmarken vnd vnholzmarken verbawten funden
oder vnfunden vnd allen andir zugehorungen wie man die mit gemeyne oder sunderlichen worten genenen mag als sie von Veterlichem anefalle
oder sust in dheinenwez an vns komen sein vnd wir sie vnz uf dise zeit gehabt vnd besezzen habn vmb Sechshundert schok prager groschen
die er vns nu mit gereiten pfenningen vpricht vnd bezalt hat Vnd dieselb Stat vnd dorffer mit allen zugehorugen als vorgeschribn stet
haben wir uffgelazzen vnd lazzen uff mit craft diz briefs dem egen(anten) vnserm herren dem keiser als eynem kunige zu behem dem durchlauchten
Fursten vnd herren hrn Wenczlawen kunige zu Behem seinem Sone irn erbn vnd nachkomen kunigen zu Behem vnd der Cronen desselbn
kunigreichs zu einem rechten eygenhaften Erbe vnd zu nuzer herschaft Vnd darumb fur vns vnd vnser Erbn vnd nachkomen ewichlich
haben wir vns vergeben vnd vergebn vns mit disem briue aller ansproche anredunge vnd zuversicht die wier zu der egen(anten) Stat Reichen
bach vnd den dorffern Diroßthow oberReichenbach Cunratsdorf Brunne vnd Schonbach vnd an allen iren zugehorungen rechten herschef
ten geniezzen vnd nuzen in aller der mazze als sie dauor begriffen sein haben gehabt haben oder ymer gehaben mochten in dheinen wez
Vnd globen fur vns vns(er) erbn vnd nachkomen mit guten trewen angenuerde dem egen(anten) vnserm h(er)ren dem keiser als einem kunig zu Behem
kunig Wenczlawe seinem Sone irn erbn vnd nachkomen kunigen zu Behem vnd der Cronen desselbn kunigreichs daz wir In die egen(anten) Stat
dorffer gute vnd zugehorugen in aller der mazze als sie dauor begriffen sein von aller anspruch vnd anredunge gen allermenglich entweren
weren vnd ledigen sullen vnd welln als recht ist Vnd vergebn vns ouch daruber aller hilffe geystlicher vnd wertlich(er) rechten vnd aller and(er)
rechter gesetze vnd gewonheite der lande die dem egen(anten) vns(er)m h(er)ren dem keiser als einem kunig zu Beh(em) kunig Wenczl(awe) seinem Sone irn erbn
vnd nachkom(en) kunig zu Beh(em) vnd der Cronen desselbn kunigreichs in den egen(anten) sachen allen oder eyns teiles zu hindrnisse od(er) zu schaden komen
mochten mit vrkunt diz briefs versigelt mit vns(er)m anhangundem Ingesigele Der gebn ist zu prage an dem Sontage so man singet
Oculi in der vasten nach Cristis geburte Dreuzehnhundert Jar darnach in dem SibenvndSechzigsten Jare