Wir Johans von gots gnaden Erczbyschoue zu Prag vnd legat des heiligen Stuls zu Rome Burghart Burggraue von Maidburg Graff zu
Hardek vnd Hofmeyster des keyserlichen houes Borso von Riesenburg vnd Thime von Koldicz Bekennen vnd tun kunt offenlich mit disem
brieff allen den die yn sehent oder horent lesen Wann der Allerdurchleuchtigste furste vnd herre her Karl romischer keyser zu allen zeiten me-
rer des Reichs vnd kunig zu Behem vnser lieber gnediger herre als ein kunig zu Behem sein Erben vnd nachkomen kunige zu Behem den
hochgebornen fursten hern Fridrich hern Balthasar vnd hrn Wilhelm marggrafen zu Meyssen iren Erben vnd nachkomen dreytusent schok gros-
zer pfenning Prager muncze schuldig sein vnd gelten sullen die der egenante vnser herre der keyser dem egenante marggraff Wilhelm zu seines
bruders des hochgebornen fursten hern Johans marggrafen zu Meyssen tochter des egenanten marggraff Wilhelm gemahel vnd ehelich wirtinne
zu eegelt vnd heymstur gelobt vnd vorheissen hat Vnd fur die er ouch sein Burg vnd Stat zum Elbogen mit nuczen eren rechten gulden vnd
allen andrn zugehorungen nichtes vzgenomen den egenanten marggrafen iren Erben vnd nachkomen vorpfendet vnd vorseczet hat In sulcher
masz das man die egenante Summe geltes den obgeschriben marggrafen iren Erben oder nachkomen sol beczalen vnuerzogentlich vff sante
Valentins tag der schirest kumpt in der Stat zu Prage als das in briefen des egenanten vnsers herren des keysers volkomenlicher ist be-
griffen Were aber daz das nicht geschee So geloben wir vorgen(ant) Johan Erczbyschoff zu Prag in guten truwen on alles geuerde die egen(ant)
Burg vnd Stat zum Elbogen fur das egenante gelt inzuantworten vnd inzugeben den vorgen(ant) marggrafen iren Erben oder nachkome ynne
zu haben mit allen genyessen vnd nuczen on allen abeslag als lange bis daz der egen(ant) vnser herre der keyser sein Erben oder nachkomen kunige
zu Behem dieselben Burg vnd Stat vmb das egenante gelt als douor geschriben steet ledigen vnd widerlosen Were aber das der egenante
Erczbyschofe sturbe in der frist da got fursey So geloben wir vorgen(ant) Burghart Burggrafe von Maidburg den egen(ant) marggrafen iren Erben vnd nach-
komen mit der egenan(ten) Burg vnd Stat zum Elbogen gleicherweis vnd in allermasz als yn der vorgen(ant) fursten vnser herre der Erczbyschoff gelobt
vnd vorheissen hat on geuerde Were aber das sache daz der vorgen(ant) Burghart in derselben frist sturbe So geloben wir vorgen(ant) Borso von Riesen-
burg den egenanten marggrafen iren Erben vnd nachkomen alles das stet vnd veste zuhalden mit der egenan(ten) Burg vnd Stat zum Elbogen als
douor begriffen ist Were aber daz der vorgenan(t) Borso von Riesenburg ouch sturbe in der frist So geloben wir vorgenant Thime von Koldicz
den egenanten marggrafen iren Erben vnd nachkomen alles das volenden vnd vssbringen mit der egen(ant) Burg vnd Stat zum Elbogen als
douor von den egenanten dreyn herren volkomenlicher beschriben steet czu vrkunt dicz briefes vorsigelt mit vnsern anhangenden Jnsigeln
der geben ist zu Prag nach Cristus gepurt dreuczehenhundert Jare darnach in dem Siben vnd Sechczigstem Jare an dem Sontag so man
singet letare in der vasten