Wir Ludowich von gotes gnaden Romischer chunich ze allen zeiten mer des Riches ch(un)d(en)
ichen offenlich an disem brief. Daz wir angesehen haben die guten dienst die vns vnser lieber ge/
triwer Nichel Hekchel purger ze Eger vntz her getan hat vn(d) noch furbaz tun sol vn(d) auch den
schaden den er von des Riches wegen genomen hat Haben wir im vn(d) seinen erben zu ergetzung
der selben dienst vnd schaden ze rehtem lehen gelihen driv phunt haller geldes auf der Mul
bei Eger vor dem miltor Vnd driv ahter chorn geldes auf dem Hof ze Niderloman da der
chleppel auf sitzet daz vns von dem Dobriner ledich worden ist also daz der selb Nichel vn(d) sein
erben daz selb gelt inne haben vn(d) niezen suln mit allen rehten vn(d) nutzen als es der selb Do/
briner gehabt hat Vnd wellen vnd gebieten allen vnsern Amptlevten vn(d) vnsern purgern ze
Eger ob si iemant an dem selben gelt irren oder hindern wolt daz si si darinn von vnsern wegen
der an schirmen als vil si chunnen vn(d) mugen. Dar uber ze vrchunde geben wir im disen
brief mit vnserm Insigel besigelten. Der geben ist ze Amberg an dem O(b)risten tag. do man
zalt. von Cristes geburt Drevzehen Hundert Iar. dar nach in dem Zwainzigistem Iar
An dem Eilften Iar Vnsers Riches.