Wir Wenczlaw von gotes gnaden Romischer kunig zu allen czeiten merer des Reichs vnd kunig zu Behem
Bekennen vnd tun kunt offenlichen mit disem briue allen den die jn sehen oder horen lesen das fur vns kumen
sind vnser Schilter gesessen in der Newenstat zu Prage vnsre liben getrewen vnd legten vns fur wie das jn von
den Geistlichen malern in der grossen Stat zu Prage gesessen grosse vnfelle vnd irrrunge geschehen drumb das sie
sich annemen zuarbeiten vnd zumalen sulche werk das Schildwerk heisset vnd die Schilter vnd nicht die geistlichn
Maler angehoret vnd das sie jn ouch weren das sie ire bylde vff den Jarmarkten in der grossen Stat zu Prage nicht
verkawffen sollen wie wol sie doch des alles von vnserm vater seligen keyser karle vnd ouch vns druber gefreyet sein
als das in desselben vnsers vaters vnd vnsery briuen die druber geben sind eigentlichen ist begriffen vnd drumb das
sulche czweyunge vnd vnfale abgetan werden So leutern seczen vnd wollen wir von kuniglicher macht zu Behem in
crafft dicz briues das furbas mere die egenan(ten) Geistlichen maler kein Schildwerk vnd mitnamen alles das werntlich
sachen angehoret nicht arbeyten sollen in dheineweys vnd das ouch die vorgen(anten) Schilter ire bylde vff den Jarmarkten in
der grossen Stat zu Prage verkawffen vnd ouch allermeniglich ire helme vnd Schilte an den hewsern in derselben
Stat zu Prage verkawffen vnd malen mogen von allermeniglich vngehindert vnd gebieten drumb allen vnsern ampt
luten vnd mitnamen den Richter Burgmeister Rate vnd Burg(er)n gmeinlichen der grossen Stat zu Prage die nu
sind oder in czeiten werden ernstlichen vnd vestiglichen mit disem briue das sie die egenan(ten) Schilter an sulchen egenan(ten)
iren gnaden vnd rechten nicht hindern oder irren in dheineweys Sunder sie dobey getrewlichen hanthaben schuczen
vnd schirmen als libe jn sey vnser swer vngnade zuuormeiden Mit vrkunt dicz briues versigelt mit vnserr kunig
lichen Maiestat Jnsigele Geben zu Prage noch Cristes geburt dreyczehenhundert Jare vnd dornach in dem Czweyvnd
newnczigistem Jare des Sunabendes vor dem Suntag als man singet Judica in der vasten Vnserr Reiche des Behe
mischen in dem Newnvndczwainczigisten vnd des Romischen in dem Sechczehenden Jaren
Ad m(an)d(a)t(um) d(omi)ni Regis p(er) p(re)po(situm) p(ra)gen(sem)
Franciscus de lomp(n)ic(z) Can(cellarius)