Ich Thomel Gyslempurg in der Grozzen Stat zu prag. Bekenn allu den di disen pruff horn ad(er) lesent. Daz ich in gut(er) v(er)nunft
mit wolbedachten mut. schaff vnd setz mein letzt(es) gescheft daz her nach stet beschribn vor disen Ersame(n) Leuten Dem
Hannus Albrecht meym swag(er). vnd vor dem fangan von pevn paid purg(er) do selbist zu prag. vnd vor h(er)r Anthonis mey(n) Caplan dy
ich sondlich zu disem gescheft erkorn vnd gepetyn han. daz sy sint Gescheftleut meins gescheftes vnd daz ausrichten nach all(er) d(er) weyse
als ich in bevolhn han. ap ich abege wann ich in daz enpfolhn hab. of ir trew Des ersten so schaff ich d(er) Cristel mein hausfrawen
of all mein gut. andertthalb hund(er)t schok grozz. ir morgengab also sam sy des hat dar vber ein(e)n pruff vo(n) mir. Dar nach schaff ich
Newn schok gl(eich) ewiges czins zu ainer ewige(n) mess dym prist(er) auch zu s(anct) Cappel. di mein eldn habn gestift zu sent Galln. do sol
auch mein begreft habn wil Danach schaff ich auch Eyn schok gl(eich) ewiges czins. zu sent Galln daz man mir all(e) quatemb(er) mit
drey(n) l(i)b(r)a(rum) grozz dar von d(er)ue sal. vnd zwen krug(er)s oel. schaff ich auch a(n)d(er)halb schok gl(eich) ewiges czins. do mit man mir meyne
jargeit began sal mit vilgen in ir(er) messe singen sun(n) weyn oblat(en) vn(d) weissprot. Den h(er)rn zu p(re)diga(r)n schaff auch dem frawen
mer(er) v(er)sern ab sy nym(m)er zu laut ko(m)me dreissig schok gl(eich) an(n)u(m) c(en)su(m) h(er)r. So enpfilh ich daz selb gelt meinen Gescheftleute(n) daz
sy da mit tun. durch mein sel wiln. waz sy dunkt das pest. Da nach schaff ich d(er) Annen sein swest(er) mein gumen vnde wery(n)
kindn. czwenczik schok gl(eich). vnd da nach d(er) katschan mein gumey als ir got gnad. vn(d) kindn. schaff ich auch czwenczik schok grozz.
vnd dem Chunrat basever. schaff ich auch seczic schok gl(eich). vber daz wil ich vnd schaff. daz man mein schult all(e) di ich redlich pyn
schuldig wo daz ist. gelon sal. den(n) aus d(er) gescheft. daz man di selb schult nicht mocht v(er)gelon so sal eyn pfennyng abegen
gleich als dem and(er)n den ich sy beschaidn han. vnd daz gelt alls. waz ich sy v(er)schaft hab. sol man nemen von meim haus vnde
hof. vnd von mein(er) cygelhutten vnd vo(n) mein(er) g(er)nd vnd von mein(er) varnden hab. der doch laid nicht vil ist. Auch wil ich vnd
schaff. daz mein Gescheftleut v(er)kaufen sulln alls mein hausgereit. vnd dar von geugen sulln noch wein rat. an sy daz gut dunkt zu
sent Galln durch d(er) havan mein(er) ersten hausfrawen. sele wiln als ir got gnad. von d(er) mir daz hausgereit wordn ist. wann mir
nichtesnicht wardn ist von d(er) Cristel mein hausfrawen. vnd waz dar vber wirt. da mit sal man mir begen(n) meyn begreft. ich wil
nut nande vnd schaff auch daz mein gnante Gescheftleut v(er)leihn sulln ewiclich zu yglicher czeit peidn czins. der da gehort zu
der egnante(n) Cappelln Erbern prist(er)n wer di sint wenn es not wirt. als oft daz ko(m)mt. durch mein vnd mein eldn sele willen
durch got Auch wil ich daz di selbn gescheftleut nymand nicht haldn sulln kainerlay rechnung. vo(n) meins gnante(n) gescheftis wegen
denn sy vnd In selbn. Ich wil auch wenn d(er) selbn Gescheftmane ayner abget. daz denn dy and(er)n czwen lebn(d)en zu hant aymen and(er)n
Ersamen man wer der sey. zu In kyzen sulln ap gen(er) abget an erwelung. der auch all dise vorschribn sache mit sampt In handl
vnd ausricht nach seiner gewissen vber daz alls wil ich auch vnd schaff. daz keines in ein(e)m front sol nach einmal nym(m)er nicht mit
kainerlay weyse mein gnantes gescheft. wid(er)sprechn wed(er) mein egnante Gescheftleut dar an hind(er)n ewiclich an(n) wer es tet dem
sal nicht werdn daz gelt das ich In schaffe sond(er) des sulln sich vnderwindn mein Gescheftleut vnd da mit tun. waz sy dunkt
das pest. durch mein sele wiln Auch wenn es geschiht daz d(er) egnant h(er)r Anthonis mein Caplan abget. so sal allerwey der eltest
Caplan d(er) da gehort zu d(er) egnate(n) Cappel. nach dem alder. vnd nicht nach den yarn. eyn Gescheftman mit sein d(er) gescheftis Zu
gezeuknuz. dar vber. so hab ich an disen p(ri)eff gehengt mein aigen Infigel. vnd zu ainer grozzern stetikeit alls meins ge
nanten gescheftis habn dise Erbn manne di gesworn rathn der egnate(n) stat zu prag. der op(er)ste von Eylaw. vnd d(er) nicolas
von dem winkel gnant auch ir zwen Infigel gehengt an disen brieff. der gebn ist nach C(ri)stes gepurt vber dreizehn
hundert jar. da nach in dem drey vnd seczcigisten jare an(n) don(n)erstage an dem abent sent sebastian vnd fabian
der heiligen mert(er)er