WIR Leopold von Gottesgnaden Erwehlter Römischer Kaiser
Zu allen Zeitten Mehrer des Reichs in Germanien zu Hungarn Böheimb Dalmatien Croatien vnd Sclavonien König. Ertzherzog
zu Osterreich, Marggraff zu Mähren, Herzog zu Lützenburg, vnd in Schlesien, vnd Marggraff zu Laußnitz. Bekennen vnd thun kundt mit diesem Brieff, vnd thuen khundt Jedermänniglich, Waßmassen Vnsere Würdige, Vnd andächtige Prior, Vnd Conuent der Patrum Carmelitarum Discalceatorum, in Vnserer Königlichen Ckleinern Statt Prag,
Vmb Vnsere gnädigste Verwilligung, damit sie Ihr ankhaufftes, vnd an Ihnem Closter gelegene, Vnd in extra clausuram befindtliches genantes Haselachische Hauß, darumben alienieren, Vnd anstatt dessen, das darher khommende pretium, ainen in dem Guth Czeling gelegenen, Ihnem so lang bestanden Hoff ankhauffen khönnen, Vnderthenigst supplicando angelangt, Vnd gebetten. Wann Wir dann gnädigst angesehen, solch Ihre gehorsambste Zimbliche Bitt, Vnd in gnaden betracht, das solches Hauß extra clausuram gelegen, Vnd
die Patres Carmelitani das darauß gelöste Gelt, Wie gemelt, zu des Conuents ankhunfftigen Nutzen anlegen wollen, Zumahlen durch ankhauffung sothanen Hoffs die biß
hero gehabte Guth Czelnitz bißhero allerhandt Vndergeloffene Nachbahrliche differentien Vermieden bleiben werden. Als haben Wir gebettenermassen hier
zu Vnsern gnädigsten Consens, Vnd Verwilligung in Kaiser: Vnd Königlichen gnaden ertheilt: Thuen das, bewilligen, Vnd theilen solches auch, Alß Regierender König in Böheimb, hiemit wissentlich, Vnd in Crafft diß Brieffs, also Vnd dergestalt, das besagte Patres Carmelitani vorbenambtes Ihr Haselachische Hauß verkauffen, Vnd Zwar
an ainen Weltlichen alienieren, Vnd das darauß khommende pretium, durch ankhauffung mehrberührten Hoffs, Wiederumb zu des Conuents Nutzen appliciren sollen, khönnen, Vnd mögen, alles getreulich, Vnd ohn gefehrde. Deß zu Vrkundt haben Wir diesen Brieff mit Vnserm Kaiser: Vnd Königlichen anhangenden grössern Insigl bekräfftigen lassen. Geben in Vnserer Statt Wienn, den Sieben Vnd zwantzigsten Monathstag Augusti, Im Sechzehenhundert, Siebentzigsten, Vnserer Reiche des Römischen im Dreyzehenden, des Hungarischen im Sechzehenden, Vnd des Böheimischen im Viertzehenden Jahr.
Ad mandatum Sac(rae) Cae(sareae)
Regiaeque M(ajesta)tis proprium.
J. F. ~Rost~