Wir purgm(aist)er und der Rât gemain der purgk ze Egr(e) bekhenn(e)n offenbær und tun chunt
allen den di disen brif sehen od(er) hœren lesen. Daz fúr uns chome und fúr g(e)t(reten) Jacob der
Goldert und lauttert und bechânt daz er den hof zum Ror do Chunrat d(er) Trapp auf
sitzt mit aht korn zinss siner hausvrowen Elzbeten gegebn und aneb(e)ntig gemacht
hât mit allem nutz und rehte dâ mit zu tun und ze lâzen waz si wil. Und trât er
des vor uns also ab daz er noch sîn erbn dâr nâch nimm(er) mer dhain ansprûch schúln
noch múgen gehâbn wed(er) vor irm tod noch nâch irm tod. Und daz si daz selb gut durch
ir und siner und ir peder vord(e)rn sel willen mit sînem willen und wortt wo an irm
siechbett also hin gebn und g(e)schafft hât. Zum ersten hât si zwai korn dâ von g(e)schafft
und di waissad di zu dem selbn gut gehœrt des selbn Goldertins swest(er) und Elzbeten
und siner toht(er) und ammen hie in daz clost(er) der swest(er) sand Clâren ordens in peden zu
gleichem tail daz si die aht(er) ierlich auf hebn und innemen schúln zu nutz und zu pez
zerung irr pfrúnde. Und wen der selbn zwaier Junchvrown nimen ist so schúln di
selbn zwai korn und waissad auf den conuent der swest(er) des selbn closters erbn und
tyeten. Dâr nâch hât si g(e)schafft dem selbn conuent di manschaft des selbn guts
alo si iezu den zinsman an di selbn swest(er) gemain hât g(e)waist. Auch hât si g(e)schafft
daz di selbn swest(er) od(er) conuent di úberigen sehs korn schúln alle Jâr innem(e)n in
selbn nûtz zu nutz sund(er) zwai korn gebn hie den pærfuzzen brud(e)rn den pre
dig(er) brud(e)rn zwai korn und den deútschen brud(e)rn zwai korn an als vil ab daz
gut an dhainen sachen abneme d(e)rruest od(er) d(e)rbr(e)nne dâ von ez den zins niht
getrag(e)n mœht wen und wie dick daz g(e)schæch dâr nâch und dannen d(er) zins ir
mœht g(e)uallen dâr nâch schúln si in ir gebn und tailn den an g(e)leichem tail. Des
alles zu urchúnd geb wir disen off(e)n brif b(e)sigelt mit d(er) stat Insigel
des di eb(e)nnant(e)n Goldert und sîn hausvrowe peder sie p(e)ten und bâten. Auch
hât d(er) eb(e)nnant conuent des zu urchúnd sîn Insigel an disen brif gehangen.
Des sint gebeten gezúgen sund(er)lich unser purgk(er) Hæinrich d(er) alt Hasenza
gel und Johans Húler. Ditz g(e)schach do man zalt von christes geburte
dreuzchenhundert Jâr dâr nâch in dem dreizend(e)m und vierzigstem Jâr des
næhsten phintztags vor phinxten :~