Ich Gungel Tacz bekenn offenbar an disem brif und tun kunt alle den di in ansehen oder
horen lesen daz ich und mein erben mit verdachten mut und mit rat unsern vreunt
den vrawen zu Eger in dem closter sand clare orden verkauft haben recht und redleich
sechthalb pfunt haller on dreyzzik haller und drey kar habern ewigs czinzz auf drein
hofen gelegen zu der hard dar auf gesezzen sein Libhart und der Haymisch und der Goltnagel
umb drey und achtzik pfunt haller on zwey und sibentzik haller di si mich und mein erben
recht und redleich bezalt haben mit beraiten pfennig on alle hindernuzz und haben in daz
beschriben gut vkauft fur ain vrey erb ob der erd und unt(er) der erd versucht und unv(er)sucht
mit allen den rechten und nuzz alz ich ez her gebracht und gehabt hab also daz ich
noch kain mein erben noch kain mein vreunt furbaz nymmer mere an dem beschribenn
erb kain ansprach schullen gewinne noch haben und schullen in daz gut vertrete fur
ain vrey erb jar und tak fur alle ansprach alz dez lantz recht ist dez sein gezevg
zu gezevg(e) rudusch angel zu den zeiten ir furmunt und hainreich dez eldn hain
reichs Hasentzagels sun purg(er) hie zu Eger und dar umb daz daz also stet beleib
on allez geuerd geben wir vorgenant(e) Gungel Tacz und rudusch angel in disen
offenn brif dez zu urkunde bestetet mit uns(er)n Insgeln di dor an hangent und
Ich egenant(er) hainreich dez eldn hainreichs hasetzagels sun sprich mich unt(er) der
offgenant(e) Gungelins Taczen und ruduschens angels Insgel wan ich kain aigen
Insgel hab daz geschah do man zalt vo(n) christi geburt dreytzehen hundert jar dor
nach in dem ainn und funfzigstem jar an dem nechste(n) freitag vor sand symons
und Jude der heyligen zwelfpoten