Wir karl von gots gnaden Romischer keis(er) zu allen zeiten merer des Reichs vnd kunig zu Behem Bekennen vnd entkunt
offenlichen mit disem briue Allen den die yn sehent oder horent lesen Das wir von wegen der geistlichen der Ebtissin meiste=
rynne vnd conuent des Juncfrawen closters zu Eger sanct claren ordens gelegen in Regenspurger Bistumb vns(er) lieben
Andechtigen demuticlichen gebeten sein das wir yn vnd yrem closter suliche hantuesten vnd briue die sie von Romischen kei=
sern vnd kunigen vnsern vorfaren an dem Reiche vnd andern Andechtigen erbern cristen lewten vber die dorffer Dremge
Ulrichsgrun vnd Schotzenrewt vnd auch ander ir guter freiheit recht gnaden vnd zugehorunge erworben vnd her=
bracht vnd alles daz in den selben hantuesten vnd brieuen begriffen ist gnediclichen geruchten zu bestetigen Des haben wir
got zu lobe vns vnd vns(er)n vorgenant(en) vorfaren an dem Reiche Selen zu hayl vnd zu troste mit wolbedachtem mute
Rat vns(er) getrewen rechter wissen vnd keis(er)licher mechte den obgenant(en) Ebtissinn meisterinne Conuent vnd closter
suliche hantuesten vnd briue mit allen freiheiten rechten gnaden vnd zugehorungen vnd auch alles daz darynne
Begriffen ist gleicherweis als ob sie von worte zu worte in disem briue begriffen weren vnd sunderlichen die dorffer
Dremge Ulrichsgrun vnd Schotzenrewte mit andern iren dorffern vnd zugehorungen wie die genant oder wo sie
gelegen sein als sie die redlichen vnd recht herbracht haben gnediclichen bestetiget beuestent vnd confirmiert be=
stetigen beuesten vnd confirmiren auch mit disem briefe Dorumb verbieten wir allen fursten geistlichen vnd werlt=
lichen Grauen freiyen Rittern knechten hawptmannen Amptlewten Burgermeistern Remenden der Stette vnd sun=
derlichen dem hawptmann vnd der Stat zu Eger vnd andern vns(er)n vnd des Reiches getrewen die nu sein oder in zeiten
werden daz sie die egenant(en) Ebtissinne meisterynne conuent vnd ir lewte dorwider nicht hindern angreiffen oder be=
schedigen sullen in dheineweis Als lieb yn sey vns(er) vnd des Reiches swere vngnade vnd die busse zehen marke gol=
des die halb in vnser vnd des Reiches camer vnd dander halbtail den clagern geuallen sullen als offte daz geschiht
vnmeiden wellen Mit vrkunt ditz brieues v(er)sigelt mit vns(er) keis(er)lichen maiestat Jngsigel der geben ist zu mulberg Nach
crists geburt dreizehenhundert Jar dornach in dem dreyvndsibenzigisten Jare an vnser frawen vffart tage Vns(er)s Reichs
in dem Sibenundzwenzigisten vnd des keistumbs in dem Achtzehenden Jaren :-

Per d(omi)n(u)m fridericu(m) de Schonnburg
Theodoric(us) Sanczrodt