Wir der Burgermaister vnd der Rat gemein der Burger zu Eger bekennen vnd tun kunt offenlich mit dem gegenwertigen briefe allen den
die in sehent oder horent lesen, daz fur vns komen ist vnser mitburger Niclas der Junckherre vnd hat bekant vnd offenlich gelaut
mert vnd veriehen daz er den erbern vnd geistlichen Junckfrowen der Ebtissinne vnd dem Conuent gemein der closteriunckfro
wen sant claren ordens in dem closter hie zu Eger vnd irem closter ewiclich zu haben geben habe drey hofe in dem dorffe zu
nidern kinnenreut fur die vier pfunt haller werunge der stat zu Eger die er in aller ierlich von seinem hause daz gelegen ist
hie zu Eger in der stat in der sleczs gazze qwischen des strangen lenguelders vnd des hansen goltsmides heusern zinsen muste
als daz der Jacob huler etwenne Burger hie zu Eger vnder der stat Insigel verbriefet verschriben vnd vermachet het vnd auf den
ebenanten dreyen hofen sein gesezzen auf dem einen der hantzel pawr vnd zinset aller Ierlich anderthalb pfunt haller auf sant michels
tag vir huner zu weihnahten ein schock ayer vnd zwen kese zu ostern auf dem andern der Gocz halcknawer vnd zinset ein pfunt
haller zwey huner virczig ayer vnd einen kese zu ebescriben fristen vnd auf dem dritten der Albrecht vnd zinset auch ein pfunt
haller zwey huner ein schock ayer vnd zwen kese zu vorbeschriben fristen vnd den ebenanten pfenninck zins allen aller Ierlich an zin
sen mit sulches geldes werunge daz ie zu den selben czeiten hie zu Eger genge vnd gebe sei vnd hat in fur die ebenanten vier pfunt
haller zinses die obenanten drey hofe vnd gut geben mit manschefften zinsen weyden scharwercken vnd mit allen gewalden eren
nuczen rechten freyheiten vnd zubehorungen wie die genant sein ob der erden vnd dar vnter keinerley auzgenumen als er dieselbn
gute innegehabt vnd her bracht hat vnd mit namen daz die ebenanten Junckfrowen die obgenanten gut von dem leut zu lehen
nemen vnd haben schuln vnd hat sich der selben vorbenanten gut aller verczigen vnd verzeihet sich der mit crafft des gegenwer
tigen briefes also daz er noch sein erben noch nachkomen mit briefen noch on briefe mit geistlichem noch werltlichem gerichte
noch rechten noch in keyner leweislich nimmer mere keyn anspruche recht noch forderunge dar an noch dar nach schuln noch mu
gen gehaben vnd hat in auch gelobt die selben gut zu verten vnd zu vorreten vnd von aller anspruche gegin aller menni
clich zu entweren Iar vnd tag als des landes vnd der stat hie zu Eger recht ist on allez geuerde vnd des alles zu vr
kunde vnd zu steticheit geben wir durch bete des obenanten Niclas Junckherren disen offen brief besigelt mit der stat an
hangendem Insigel vnd ich ebenanter Niclas der Junckherre habe des alles zu bekentnisse mein Insigel auch gehangen an den
gegenwertigen brief der geben ist do man zalte von cristes geburte dreyczehenhundert Iar dar nach in dem sechs vnd
sibenczigsten Iare an vnsers herren leichnams abende