Ich peter der Nothafft zum Tirsnein gesessen Bekenn und tun kunt offenlich mit dem gegenbartigen brif allen den die in sehent / horent / oder lesent
daz ich mein eliche Hausfrawe und mein erben mit gutem willen und mit wolbedachtem mute umb gelt daz wir gar und gancz gericht gewert
und beczalt sein und daz an unser frumen und nucz komen ist recht und redlich und aberkauft verkaufft und zu kauffen geben haben frei und ledig der
Edeln claren Junckfrawen Junckfrawen Elsbethen des Edeln H(er)n Ernsten von swamberk zu der czeit pflegers zu Eger tochter und der Erwirdige(n)
und geistlichen Junckfrawen der Ebtessin und dem Conuent gemeinlichen sande claren ordens zu Eger unser zwen hofe zu tremanzgrun in dem dorff
gelegen do zu den geczeiten auf gesessen sint / der nikel poler und hans der Euterolff die selben zwen hofe mit dem halsgericht / mit lehen / mit manschaft
ren / mit czinsen / mit czehenden / mit wälden / mit holcz / mit velden / mit wisen / mit ackern / mit holcz / mit püschen
mit velde / mit stocken / mit steinen / mit wäzzern / mit pächen / mit rünne / mit weide / ob der erde und under der erde besucht und unbesucht mit allen gewalden
vellen / nuczen / eren / rechten und zugehörungen sie sein in dem brif geschriben oder nicht geschriben benant oder unbenant / kainerley ausgenomen / Als die
egenanten gute von alter her an uns sint komen und als wir die furdas habhaft haben nichts ausgenomen / an aller geuarde und die egenanten lewte
die auf den ebentanten hofen gesessen sint / oder die in künfftigen czeiten dar auf siczen werden die schüln in allen unsern welden und holczern alle ir notdurft
holcz hawen und daz füren und mit irm vihe waide haben / suchen und nemen on alle hindernuss unser / und alle unser nachkomen unser erben unser ampt
leute und diner als under aigen lewte on alle arglist und ich obgenant peter Nothafft mein eliche Hausfrawe und mein erben und unser nachkomen ver
czcihen uns der obgenanten hofe und gut und aller ir zugehörunge in crafft des gegenbertigen brifs / als vor oben geschriben ist / also daz wir noch kein uns(er)
freunde und mage noch nymant von unser wegen weder mit gaistlichen noch mit werntlichen gerichte und rechten / noch on recht / weder mit brifen noch on
brife in kainerley weise nymmermere kainerlei anspruch zu furdern / recht noch vordrunge dar czu und dar nach gehaben gewinnen schüln künnen noch müge(n)
aller geuarde hie von aus geschaiden auch geloben wir in die vorgeschriben gute mit allen iren zugehörungen zu waren und zu vertretten und zu entwern / und
gein aller meniglichen zu freyen / zu ledigen und zu entwirren Jare und tage als ander gute der stat und des landes zu Eger gewonhait und recht ist / und
daz daz alles also stet und gancz beleibe und unuerruckt gehalden werde on aller geuarde des geben ich obgenanter peter Nothafft fur mich fur mein Hausfrawen
fur mein erben und unser nachkomen den offen brif zu urkunde und zu stetigkait uersigelt mit meinem anhangendem Insigel und des sint gebeten geczeugen
die Erbarn und beschaiden peter der kover zu der czeit amptman zum libenstain hans der schünting zum körenbach gesessen und die Erben und weisen heincz der
franckengrüner zu der czeit burkmaist(er) und niclas der Endres zu der czeit Rathsir zu Eger und haben durch unser gebete willen des zu geczeugniss ir
Insigel in an schaden und on arglist auch gehangen an den gegenbartigen brif der geben ist do man zalt von crists geburt dreuczehenhundert Jare dar
nach in dem funf und neunczigisten Jare an dem nähsten aczittage nach dem Jars tage