Ich Engelhard Nertel gesessen czu Plandorff bekenne mit dem offenn brife allen die in sahent oder horent lesen wan die czwey tagwerk wismats genant czum
kobolt die ich den closter Junckfrawen czu Eger anraichte vnd sprach sie weren mein vnd hette sie von dem Reiche czu lehen den genanten closter Junckfrawen mit
dem rechten sint czugesaget worden also daz sie in das kauffrechte des hofes den ich von den genanten Junckfrawen habe vnd czu denselben guten sullen ewiclich geho
ren dar vmb gelob ich mit bewerunge des brifes das ich noch meine erben noch nachkomen noch nymand von vnser wegen nach den ebenanten czweyn tagwerck
wismats weder geystlich noch werltlich ewiclich nymermer keinerley anspruche ansprach recht noch vorderunge sullen wellen noch mugen gehaben sunder
sie sullen bei den obgenanten guten ewiclichen in dem kauffrechten blaiben vnd dar czu gehoren als sie mit dem rechten dar czu sint gesaget vnd des alles czu
vrkunde vnd stetikeit gib ich obgenanter Engelhard Nertel in den offen brif versigelt mit Insigeln des erbn vesten peters pfreymders czu der czeit
Richter vnd der Ersamen des ludwiges Juren vnd des hannsen pecherers czu der czeit Rathsheren czu Eger die haben durch meiner fleyssigen bete willen
des czu geczeugnisse in on schaden ire Insigel gehangen an den gegenwertigen brif der geben ist nach Cristi gepurt zale dreyczenhundert vnd in dem
newnvndnewnczigstem Jare am nehsten sunabende vor sant Johannes des heiligen tauffers tage