Ich Elbel platzer tzu dreintz gesessen Bekenne offenlich an dysem brife allen dye yn sehen oder horen lesen daz ich vnd mein Eliche hawzfraw vnd alle
vnser Erben auff vnsern Hof den wir tzu dreintz haben darauff wir ytzunt siczen vnd alle seine tzubehornuge die funfftzehende garbe alle Jar Jerlichen
tzu tzehenden vnd tzugeben als dann aller getrayde tzehenten recht ist mit allen gewalden eren nutzen rechten vnd freyhayten vnd von dem
heyligen krewtz tzulehen dem Ersamen Seydel Schuster purger tzu Eger vnd seiner Elichen hawzfrawen vnd seinen erben vnd seinem pruder
dem fridzen merel tzu amansgrun vnd sein Erben haben redlichen vnd recht tzu kawffen geben vnd verkawffet vmb tzehenhalp schok guter
Behemischer groschen die sie vns berayt haben betzalet vnd die wir an vnser frumen vnd nutz haben gewendet Vnd welchs Jares wir oder vnsere
nachkomen die denselben vnser hof nach vns ynne haben oder besiczen In den ebenten getrayde tzehenten nicht richten vnd geben als gewonhait
vnd recht ist So schullen sie des ye von vns vnd vnser hofe vnd guten bekumen als dann vmb alle andere Ebtzehenten des Egerlandes recht ist vnd
gewonhait on alle vnser widerrede oder hindernisse vngeuerde Doch haben wir yn den ebenten tzins verkawfft in sulcher weise vnd in der beschaidenhait
also wenn vnd welchs Jares in kurtzer oder langer tzeit wir oder vnser nachkomen den ebenten getrayde tzehenten vmb tzehenhalp schok guter Behemischer gr(oschen)
vnd ye vmb den heyligen obersten tag von yn oder Jren Nachkomen wider abkawffen wollen oder mugen So schullen sie vns den tzehenten wider abentkawffen
geben vnvertzegenlich vnd on alle widerrede vngeuerde Vnd wer von Jren wegen dysen brieff ynnen hat vnd weist der schol vmb den ebenten tzehenten
alle Jre gewalt forderung vnd recht haben als sie selber Vnd des alles tzu vrkunde vnd steter warer sicherhayt gebe ich vorgenanter Elbel platzer dysen
offen brieff mit der Erbern herren des Sygmund Ruduschen vnd des hannsen totenplaners die tzeit pawde Rutherren tzu Eger Jnsigeln versigelt Vnd
die haben sie von meiner fleissigen pete wegen des alles tzugeczewknisse Jron entgelt gehangen an dysen brieff Der geben ist des nehsten Sonabents
vor dem Sontage als man singet Jnuocauit in der fasten als man tzalt nach Cristi gepurte virtzenhundert vnd in dem achtzehendem Jare