Ich Heinrich possed zu hasla gesessen Bekenne fur mich mein Eliche hawsfrawen vnd alle vnsere
Erben vnd nachkomen offenlich an disem briff allen den die In sehen horen oder lesen das wir vnsere
zwen hofe dy wir gehabt haben czu nider vnderfrewt auff dem eynem do zu der czeit auff siczt
der wittich vnd ein kur getreides halp korn vnd halp habern dauon czinset vnd auch eber~s~od vnd
auff dem andern hof do der hanns pruhler auff siczt vnd achthalben newen grosschen vnd auch
eber~s~od dauon czinset dieselben hofe mit mannschafften czinsen Scharwerch wiesn Ecker holczern
welden wassern stocken steinen wunnen weiden vnd allen czugehorungen vnter der erden vnd
daruber sie sein in dem briff bescriben od(er) nicht kainerlai aussgenome als wir dieselben hofe vnd
ire czugehorunge ynne gehabt vnd herbracht habn vnd alz die an vnd lome sein haben redlich
vnd recht vnd erbiclichn czurechtem Erbe vnd von dem heiligen krewcz czulehen czukauffen
geben vnd verkaufft dem Ersamen weisen Niclasen winczrawer purger zu Eger seiner Elichen
hawsfrawen vnd allen sein Erbn vnd nachkome vnd geloben in denselben hof mit allen sein
czugehorungen czutreten vnd czusprechen vnd von allen ansprachn gegen allmenclich zu
steen czuledigen vnd czu entweren Jar vnd tag alz Stat vnd landes zu Eg(er) recht ist vnd
gereden auch daz wir noch nymants von vnsern wegn furbaß ebiclich nymerm kainerley
anspruch forderung noch recht darczu noch dornach sullen noch wollen gehabn wed(er) mit
geistlichen noch werntlichen rechtn noch in kainerweiß on allez geuerde Vnd des czu
vrkund hab ich ebernant possed mein Insigel an disn briff gehangen vnd hab gebeten die
Ersamen tomas mewlen vnd thoman Schrotlen zu der czeit des gmeinen rates zu
Eger die durch mein pete willen des czeugewesnuss ir irn baiden Ire Insigel auch an
disn briff gehangen habn der geben ist nach cristo geburt Tausent vierhund(er)t
dornach in dem Sibenvndczwenczigistem Jare an Sand petri vnd pauli tage :~D~