Ich Niclas Pomeraner purger zu Eger Bekenne vnd thu kunt offenlich an dysem brife vor allen den die
In sehen ader horen lesen das ich mit wolbedachtem mute guten willen vnd rechter wissen den Erwirdi
gen geystlichen Juncfrawen der Ebtissin der prafstain vnd dem ganzen Conuent des Juncfrawen closters
sand Claren zu Eger der furmunde vnd vorsteer ich pin dyse zceit pin mein zehenden grossen vnd
klein den ich gehabt hab auf dem dorffe zu nider borderstrewt mit allen rechten vnd nuczen vnd in aller
mas als ich den yngehabt hab vnd als der von dem Sigmumd Juncfraw an mich komen ist zu rechten
freyen eygen ewigem erbe vnd von dem haligen kreucz zulehen hab recht redlich vnd erbeclich zukauffen
geben vnd verkaufft vmb ein Smm gelts der ich gancz bezalt vnd ausgericht worden pin vnd sy drumb
quit ledig vnd los sage vnd gelob mit disem brife yn sulchen vorgemelten zehenden von allen an
spruchen vnd gen allermennlich zufreyen zuledigen vnd zuentweren Jar vnd tag als des lannds
recht ist vnd verzeyhe mich desselben zehenden mit krafft dicz briefs so das ich mein erben vnd nachkome(n)
noch nymants von mein wegen In zukunfftinlich drein noch dornach nicht zusprechen noch zuredn
haben sullen wellen noch mugen mit keym gerichte noch rechten noch an keyner stat geystlich ader wert
lich noch in keynerleis dann ich yn sulchs zehenden vor andern gegonnet vnd In vnd iren nachkome(n)
den zu gute fromen vnd nucz von besunder gunst vnd trew vnd irer pete wegen werden lassen hab
doran sie auch von mir mein erben vnd nachkomen vnd allermennlich von mein wegen vnbetridigt
ewiclich sein vnd bleben sullen on alle geverd vnd gib In des zu warer vrkund disen briefe mit
meim selbs eygen anhangenden Insigel vorsigilt vnd zu einer pessern geczewkniss haben dy Ersame(n)
Cristoff delinger vnd Cunrad haller beid des Rats zu Eger ire Insigel vmb meiner bete wegen yn on
schaden auch an den brief gehangen der geben ist nach Cristi gepurt vierzehnhundert vnd ym Sechs
vnddreissigsten Jare an sand vlrichs tage