Ich Vrsula wernherin Jorgen wernhers Burgers zu Eger gotseligen gelassene tochter bekenn vnd tůn kund offenlich an disen brief gen allermenniclich dy In sehen
ader horen lesen das ich mich von gotlicher emgab vnd eynflus wegen des heiligen gaists got dem herrn der himelkunigin Marien vnd aller himelischen herschaft
vnd der heiligen Juncfrawen Sant Claren vnd allen gots heiligen zu lob eren vnd wirdikait vnd mein selbs aller meiner eldern vorfarn vnd nachkomen vnd
aller Cristglaubigen Selen zu trost gnaden vnd seligkait von freyen aigen vnd vnbetwungen willen in das Closter Sannd Claren ordens alhie zu Eger ge
geben hab Vnd das in vmb mein habe veterlich vnd mütterlich Er das auf acht hundert guldin das mir worden ist trift nach laut zwaier außge
snyten betaidigs zetell von nymand nicht kain zwitracht ader Irrsal gescheen dürff Sunder wie es dorumb ein gestallt haben soll Das ich mit wolbe
dachtem müte freyen guten willen rechter vornunfft vnd wissen mein vnwiderrüfflichs lezt geschefft getan vnd geordent Thů ordn vnd bestell
das mit disem genwertigen brif als hernach geschriben stet Item züm ersten schick vnd schaff ich meinem obgenanten closter alhie dreyhundert
reinisch gulden vnd funfftzig gulden mir selbs zu mein pürtein dornach schick ich franncz Junccheren meinem ohem Hundert reynisch guldin
Item den pridern ym obern Closter zwaintzig guld(en) zu pürtein vnd zwaintzig gulden züm gepew Item zwaintzig gulden in das spital zu
pesserung der wochen heller der armen leute Item zwaintzig guld(en) den Suestern der dritten regell hinder der Schül Item zehen gulden züm reiche
Almusen Item zehen gulden für ein pitanczen In predigern vnd fünff gulden züm gepew Item zwaintzig gulden für ein Kompach vnd ein or
farb Item drey grobe tücher armen leuten vmb gots willen Item zehen guld(en) züm gepew in dy pfarr Item zwaintzig gulden zu stegen vnd wegen
Item vnd das mein vormund ein prister bestellen sollen der ein gancz Jar messe helt dorümb sol man Im sein willen machen als pillich vnd gepurlich
ist Solichs meins vnwiderrüfflichs gescheffts Secz vnd kiß ich zu vormunden dy Erbern weysen franncz Junccheren vnd hannsen wernher paid
mein ohem das sy mir solich mein geschefft trewlich außrichten sollen domit dem nachgangen vnd gehalden werd als ich das geschafft vnd gemaynt
hab als ich In dann getraw vnd glaub vnd was noch vberig meiner hab vnd nit verschaft ist mit derselben sollen sy sich halden nach meym
willen befelh vnd gehaiß wer aber das sy in eym ader mer stücken vndreynander stössig wurden ader solichs nach meym geschefft vnd willen nit
außrichten wolten was sy dann ein erber Rate mein herrn zu Eger ader dy zwen mein her Jorg Smydl vnd Sygmund partman darInn hayssen
vnd weysen das sollen sy tün vnd also demselben nachgen on widerred vnd on allen behelff Auch ob ichtz von des gots wegen das verlorn sol sein
in kurcz ader lang an tag käm vnd foderung dorumb bescheen würdy do wil ich mich mit der betaidigung dy zwischen mir vnd meym ohem
hansen wernher nach Innhalt zwaier außgesnyten zedel bescheen ist vnuerzigen haben vnd hab zu mein vormunden getrawen Sie werdy
sich dorein finden vnd hilf vnd beystant tün domit ob mir doran was geprechen würd mir ader wem ich das zu aigen ader schick das volg vnd
werde des alles züwarer vrkund vnd stetikait hab ich obgenante vrsula wernherin mit vleiß gepeten dy Erbern vnd weysen Clement püchelperger
vnd Erharten haller paid des rats dy zeit zu Eger das sy Ir Insigel von meiner bete wegen der zugezewcknus In vnd Iren erben on schad(en) an den brif
haben gehangen der geben ist an sand Margareten tag Nach Cristi gepurth vierzehnhundert vnd ym drey vnd Sibentzigistem Jar