Ich hanns walther zw wildstain vnd ich Toman walther zw Nider loman gebruder Bekennen vnd thun kundt offenlich
an diesen brief ynn meniclich Das wir vnsers vaters seligen Hofell vnnd gütell gelegen zw der öde hinter den
Erbwirdigen vnd gaistlichen Closter Junckfrawen zw Eger mit allen vnd yden rechten zw dorff vnd veld mit funffzehe
grossen Statwerung vnd ein zehendt hannen den genanten Junckfrawen Gethaft vmb sust frey Dem Nickel Hundt
zw Hirsfelt vnnserm Swager verkaufft haben vnd widerumb der gedacht Hundt das genant gütell in allen rechten
wie bemellt hannsen Meynl von Hohdorff verkaufft hat Darauff So verzeihen wir vns obgenante verkauffer
vnd wir hernachbenante hanns Feickell zw pirck von meiner Haussfrawen Elsbeten wegen Matell Horpst
zw Oberloman vrsula hannsen ditells zw fleisen haussfraw vnd katherina hannsen francken Jnn der Hauss
fraw alle der genanten walther verwandten alle samptlich fur vns all vnnser erben erbneümen vnd nachkomen
des obgemellten Hofleins vnd gütels mit aller gerechtigkait vnd Zugehorung nichts aussgenomen In crafft vnd
macht des briefs on als geuerde vnd gereden alle samptlich vnd yde besunder fur vns all vnnser erben
erbeneümen vnd nachkomen vnd meniclich von vnnsern wegen Die genanten Erwirdigen vnd gaistlichen Junck
frawen die Ebbteissin vnd gancz Conuent all Jr nachkomen vnd all die Iren nymand aussgeschlossen noch den
Innhaber des gemellten guts yczunt vnd zukunfftig hinfur zw ewigen zeitten von des genanten Gütells
aller seiner Zugehorung noch von eynicherley desshalben wegen warend vnwarend clein gros wenig ader
vil nymmermer anzwlangen noch zwbetawigen weder mit worten wercken gaistlichen weltlichen haimlich
noch offenlichen rechten noch one recht gancz in kainerweis bey vnnsern guten waren treüen on arck vnd
vngeuerde wann wir des on allen vnnsern schaden gancz vnd gar benugt vnnd entricht sein Des zw waren
vrlund han wir obgenanten walther gebruder Feickell Horpst vrsul vnd katherina fur vns all vnnser erben
erbneümen vnd nachkomen gebeten Die Erbern vnd weisen hern Thomanen weinber vnd Endresen Spaier baid
des Rats zw Eger das Sie Ir Jngsigell von vnnser bete wegen des Ingesigellens In on schaden an den
brief haben gehangen Der geben ist am Montag nach dem Sontag Inuocauit In der hailigen vasten
Nach Cristi geburt funffzehenhundert vnd ym Andern Jare