Ich Endres Gindell des hantwergs ein Schuster vnd ich Martha Gindlin sein Ewefraw baide des Jorgen Gindels etwen gesessen
zw Nidern Schossenrewt hunder dem Erwirdigen Closter Junckfrawen zw Eger seligen kinder Bekennen fur vns all vnser
erben vnd nachkomen offenlich an disem brif von allermenniclich Das vnser lieber ohem hanns Gindell gesessen gewest zw
Nidern Schossenrewt vnd sich nu geen cleinen Gatell gezogen hat alles vnser veterlich vnd muterlich erbteil mit gunst
wissen vnd willen der genanten vnser herschafft auch vnser von vnsern wegen vmb gu gut Jnnen hat des wir
also von vnd an Jn vnd seinen erben Jngewarten haben vnd wissen Dorauff wir obgedachten Endres vnd Martha ge
swister fur vns all vnser erben erbnemen vnd nachkomen Die obgenanten vnser herschafft die Erwirdigen vnd gaist
lichen Ebbteßin vnd Conuent des Closters Sant Claren Ordens zw Eger vnd all Jr nachkomen vnd die Jren sulchs des
bestimpten vnsers veterlichen vnd muterlichen erbteils erbe aigen ligent varent vnd vnvarent nichts außgenomen Jn
crafft vnd macht des brifs gancz quit frey ledig vnd los sagen von aller anforderung deßhalben von Jn lauterlich
verzeihen on als geuerde Bereden vnd globen dabey das weder wir semptlich noch vnser kains in besunder noch
all vnser vnd eins Jden erben erbnemen vnd nachkomen noch nymant von vnsern wegen Die obgenanten Erwirdigen
Ebbteßin vnd Conuent vnd all Jr nachkomen noch Jr Yemant vnd nymant der Jren in gemain noch besunder von des
gemelten vnsers veterlichen vnd muterlichen erbteils habs erbs aigen ligent varent vnnd vnvarent weder vmb dain
gros wenig ader vil wegen gancz nichts außgenomen hinfur Jw ewigen zeiten nymmermer betaidigen anlangen noch an
sprechen noch kain forderung anspruch zuspruch recht noch gerechtikait dodurch ader dorumb von Jn nit haben noch
gewynnen sollen noch wollen weder mit rechtt gaistlich weltlich haimlich noch offenlich noch one recht gancz in
kainerweis bey vnsern guten waren trewen lauterlich on arck vnd ongeuerde Des zwuarer vrkund han wir obge
nanten Endres vnd Martha geswister fur vns all vnser erben erbnemen vnd nachkomen mit vleis gebeten Die
Erbarn vnd weisen hern Thomasen Wernher die zeit Burgermeister vnd Endresen paier auch des Rats zw Eger
das Sie Jr Jnsigell von vnser bete wegen des zugezeugknis Jn on schaden an den brif haben gehangen Der
geben ist am tag francisci Nach Cristi geburt funffzehenhundert vnnd Jm Andern Jare