Ich Michell vnd Jobst gebruder des Jobsten Domans zw sirban gesessen seligen gelassen Svn Bekennen fur vns all vnser erben erbnemen
vnnd nachkomen offenlich an disen brieff gen allermeniclich Das vns die Erwirdigen vnd gaystlichen Jvnckfrawen die Ebbtessin vnd Conuent
Sant Claren Ordens zw Eger vnser gnedige libe herschafft vnser veterlich erbteil nemlich Achtvndzwainczig Schock gross(en)
Statwerung zw Eger vnd anders das vns zustendig vnd zw vnserm teill geburt hat gutlich gefolgen haben lassen das wir Jn
vleissig dancken Vnd dorauff die gemellten Ebbtessin vnd Conuent vnd all Jr nachkomen fur vns all vnser erben erbnemen vnd
nachkomen solchs vnsers veterlichen erbteils gelts vnd anders das vns geburt hat Jn crafft vnd macht des brifs gancz vnd
gar qvit frey ledig vnd los sagen Vnd gereden Das weder wir noch kainer vnser freunt erben erbnemen vnd nachkomen
noch nymant von vnsern wegen Die mergemellten vnser herschafft all Jr nachkomen vnd die Jn vnderworffen vnd verivandt
sein nymant aussgeslossen von solchs vnsers veterlichen erbteils gellt vnd anders vns zustendig gewest noch vmb ainicherley
desshalben berurend nichts aussgenomen weder vmb clain gros wenig ader vil wegen hinfur zw ewigen zeiten nymermer betaidige(n)
anlangen noch ansprechen sollen noch wollen weder mit recht gaystlich werltlich haimlich noch offenlich noch one recht gancz in
kainerweis bey vnsern guten waren trewen on arck vnd ongeuerde Der zwuarer vrkund han wir obgenanten Michal vnd Jobst
gebruder fur vns all vnser erben erbnemen vnd nachkomen gebeten Die Erbern vnd weisen hern Thomasen wernher die zeit
Burgirmaister vnd Endresen pawr auch des Rats zw Eger das Sie Jr Jnsigel von vnser bete wegen des Jngezeugknus
Jn on schaden an den brif haben gehangen Der geben ist am montag noch dem Sontag Jubilate Nach Cristi geburt funff
zehenhundert vnd ym Vierden Jare