Ich Georg Schuster zw Treirch bekenn fur mich all mein erben vnnd nachkomen offenntlich
an diesen brieff gen allermenniglich, Das Jch mit guten willen vnnd rechter wissen mein hof
gelegen alda zw Treirch hinter den Erwirdigenn vnnd gaistlichen Closter Junckfrawen sannt
Claren Ordens zw Eger, vnnd zwischenn Jobsten hamerschmids vnnd Georgen fritzschen hofen,
mit grunt poden allen nutzen rechten vnnd zugehoringen eckern vnnd wiesen nichts außge=
nomen, als Jch den gehabt, zinst Jerlich den gedachten Junckfrawen Sechs kax, neunder ein
mesel korn, neun meslein waitz, zway kax vnnd zehen nepff habernn, dreyzehen keß Sibenn
zehen ayer, zwen hennen, vnnd zwainhig meyssner Statwerung an gelt, mitsambt der Man=
schafft Scharwerckenn fellen vnnd annder gerechtigkait darauff, vnnd gibt dem hern Compther
das dreissigist, sunst ledig vnnd frey, Dem Ersamen hannsen vbelacker itzt darauff ge=
sessenn allenn sein erben vnnd nachkommen vmb ein Sum gelts, nemlich en zwelff, zway
hundert guldein reinisch guter Lanndswerung, der Jch von Jm par bezalt worden bin, vnnd
Jn der quit frey ledig vnnd los sag, Hab recht vnnd redlich zukauffen geben vnnd verkaufft
Des Jch mich auch hierJnn leuterlich vnnd genntzlich verzeihe en als geuerde, Vnnd ge=
rede das weder Jch all mein erbenn vnnd nachkommenn, noch nymant von vnnserr wegen
Gedachtenn kauffer all sein erbenn vnnd nachkommen, von des bestimbten hoffs mit seiner
Zugehoring noch derselbenn berurten kauffsum wegenn, hinfur zw ewigen zeittenn,
nymermer betaidigen anlangen noch zusprechenn sollen noch wellen, weder mit recht
gaistlich werntlich haimlich noch offenntlich noch on recht gannz in kainerweys bey
vnnsern guten waren treuenn en arck vnnd ongeuerde, Vnnd glob Jm auch den mit aller
Zugehoring vber bemelten Zins, dreissigist vnnd wie obstet, verrer von allen rechtlichen
ansprach gen meniglich zufreyenn zuledigenn vnnd zuentweren als der Stat zw Eger
recht vnnd gewonhait ist, en allenn Jrenn schaden ongeuerde, Des zuwarer vrkund
hab Jch obgenannter Georg Schuster fur mich all mein erbenn vnnd nachkomen gebeten,
die erbern vnnd weisen herrn Thomaßen Vogel vnnd hannsen Smidel bede des Jnnern
Rats zw Eger, das Sie Jr Jngsiegel von meiner bete wegen, des zugezeucknus Jn en schaden
an den brieff habenn gehanngenn, Der gebenn ist am freytag nach Reminiscere in
der vasten, vnnd Cristj geburt Funffzehenhundert vnd Jm Zwainndvirtzigsten Jare