Wir Sigmund von gottes gnaden Romischer keyser Zuallen Zeytten Merer des Reichs Vnd Zu Hungern Zu Behem Dalmacien Croacien etc(etera) kunig Bekennen Vnd thun kundt offenbar
mit disem brieff allen den die in sehen ader horen lesen Das wir wol von alle wege geneigt sein alle vnd igliche Vnsere Vnd des reichs vndertane vnd getrewe Zufurdern Vnd als wir
beste mugen Zubelewaren ydoch sein wir me willig vnd geneigt die geistliche pason die in Junckfrewlichen wesen vnd von irgent auff die werlt vppikeit Zuruck geworffen hant vnd dem al=
mechtigen got in eim geistlichen lauttern leben dienen vnd in abgedrotem leben mit vnser keyserlichen gnad Zubedencken gnediclich Zuhandthaben vnd Zu schirmen Vnd in auch fride vnd gemach
Zuschaffen das sie eim vnsern herrn dester bas liebhaben in fridlichem Vnd gutem wesen desterbas geloben Vnd Jungeclicher pitten mugen Wann wir nu wol gehort vnd gemerckt haben do
wir Zu Eger waren das die Ersame vnd geistliche Vnsere liebe andechtige die Eptissin vnd das Conuent gemainclichen des closters Zu Eger sand Claren ordens in regenspurger bistumb gelegen
eins ordenlichen lebens sein Vnd ir Zeit in gottes dinst teglichen mit singen vnd lesen redlich vnd ersamlich verzeren Vnd darumb das sie solch gots dinst desterbas geuben vnd darzu frid
vnd gemach haben mugen Haben wir In mit wolbedachtem mute gutem rathe vnd rechter wissen dise gnad getan geordent vnd gesatzt Tun ordenieren vnd setzen von romischer kayserlicher
macht in krafft dis brieff Also das kein Burggraff ader amptman Zu weissenstain vnd Tirstain des obgenant closters leuthe die vff vnser vnd des reichs walde vmb holtz faren hin=
fur nicht straffen noch bekumern sullen in einicherlai weiss Sunder sie sullen dorfur faren frey ledig Vnd von dem Burggrauen ader amptleuthen Zu weissenstain vnd Tirstain Vnd
menigclichs von Iren wegen Vngehindert als offt sie wollen Vnd in das noth haisscht Vnd als sie dann des von langen Zeytten von Vnsern vorfarn Romischen kaysern vnd kun=
gen gefreyet sein Auch setzen vnd wollen wir das kein burggraff Zum Elnbogen vnd ander die darumb gelegen sein In gotshaus leuthe Vnd sunderlich in hewern bescheffen=
umb gesessen hinfur mit kainen dinsten noch fur wider iren willen besweren noch bekumern sullen in einicherlai weiss ander dann von alterssher komen ist Auch setzen vnd wollen
wir das sie kainen fur dinsten ein vnd auss die stat Eger Zuthun hinfur wider iren willen nit beswert wern sullen dem rathe eim pfleger vnd der stat Zu Eger an iren dinsten
vnnegriffen als dann das von alters herkomen ist Dessglaichen sol man sie mit irer furay vff irem hewe nit ferre besweren dann als vil das auch von alters herkomen Vnd
gewonheit ist Auch als sie etlich acker vorzeytten verkaufft haben von grosser schuld wegen dorfur sie dann komen waren Also haben wir In von Vnser besunder gnaden gegunnet
vnd erlaubet Gunnen vnd erlauben mit disem brieff das sie ander Vnd als vil guter an stat derselben widerumb kauffen mugen on meniclichs antrag vnd widersprechen Auch als sie des ge=
gent Schossenreuth mit Iren nutzen vnd blancken das sie als meniclichen gesind hant Vnd das sie in geinlicher gewar besessen hant vnd noch besitzent Vnd innhaben Also geben
wir In dasselb gegent von newes Vnd setzen vnd wollen das sie des hinfur Innehaben da gebrauchen sullen Vnd niessen von allermenigclich vngehindert Vnd auch das sie hie=
bei von meniclichs vnbekumert bliben mugen Haben wir sie auch alle vnd igliche Ire leuthe guter vnd hab wo die genant oder vngenant oder wo die gesessen ader gelegen sind in Vnsern Vnd des
reichs sunderlichen schirme gnediclich genomen vnd entpfangen nemen vnd entpfahen sie auch darmit von romischer kayserlicher macht in krafft dis brieff Wir haben auch densel=
ben obgenant Ebtissin Conuent vnd closter alle vnd igliche Ire gnad freyheite Rechte brieue priuilegia vnd hantuesten die In von romischen kaysern vnd kunigen vnsern vorfarn Auch
da Cron Zu Behem Vnd andern fromen cristen gegeben sind Vnd auch alle ire loblich vnd gute gewonheit die sie redlich herbracht hant gnediclich vernewet vnd bestetiget Vernewen vnd
bestetigen In die auch in krafft dis brieues von romischer kayserlicher macht volkomenheit Vnd mainen setzen vnd wollen das die furbas irer krefftig sein vnd dabein bliben Vnd das sie der auch
an allen enden gebrauchen vnd geniessen sullen vnd mugen gleicherweiss als ob die alle von wort Zu worte in disem gegenwertigen brieff geschriben stunden Vnd wir gebieten darumb al=
len vnd iglichen fursten Gaistlichen Vnd weltlichen Grauen freyen Rittern knechten Burggrauen Vogten Amptleuthen Landrichtern richtern Burgarmaistern Reten vnd gemainden Vnd
sust allen andern vnsern vnd des reichs Vnd vnser kunigreich Zu Behem Vndertanen vnd getrewen von romischer kayserlicher macht ernstlichen Vnd vestelich mit disem brieue das sie die ob=
genant Ebtissin Conuent vnd closter sant Claren Zu Eger an den vorgeschriben vnsern gnad freyheiten begabungen rechten brieuen priuilegien hantuesten guten gewonheiten Vnd vnser bestetigung
nicht hindern ader Irren in kain weiss Sunder sie dabein genzlich hanthaben schutzen vnd schirmen Vnd geinlichen bliben lassen Als lieb In vnd des reichs hulde sey Vnd swer vngenade
Zuueermeiden Mit vrkund des briefs versigelt mit vnserm kayserlichen Maiestat Insigel Geben Zu Eger Nach Cristi geburt vierzehenhundert Iar Vnd darnach in dem Siben=
vnddreissigisten Iare Am nechsten freitag nach sant peters tag ad vincula Vnsers reichs des Hungerischen in Im Einvndfunfftzigisten des romischen Im SibenVndzweintzigisten des Be=
hemischen Im achtzehenden Vnd des kaysertumbs Im funfften Iaren
Ich Erhartus pleidner Tempel Vnd pfarrer Vnd die gantz Conuent deiss ordens Zu Eger Bekennen fur allermenigclich das wir den Hauptbrieff
der obgeschriben copey ader abschrefften durch bit willen der Erwirdigen Wolgebornen frawen fraw Vrsula geborne Schlickin Ebtissin des ob=
closters Zu Sant Claren allhie Zu Eger Vnd irer Conuent Mit vleiss wol vnd aigentlich besehen vberlesen Vnd den an pargamen geschriben
Insigel Vnd an allen statten gantz vnuermailigt vnuerlescht gantz Vnd vnuerseert gesehen vnd gefund der auch lauttet von wort Zu worte
als die obgeschriben abschrift ader Vidimus Innhalt Zur bekantnuss haben wir dess vnsers hauss vnd pfarr Insigel vnden an dass gegenwertig
Vidimus gehangt Doch vns Vnsern nachkomen Vnd hauss on schaden Dass geben ist am abent Sant Iacob der hailigen Zwelfpoten
Nach Cristi geburt funfftzehenhundert Vnd im VierVndviertzigisten Iare