Ich Caspar Stadler Zinn altm(ar)ckt Bekenn fur mich alle meine Erben Vnnd Erbne(m)er offe(n)tlich an disem brief gen allermenig
clich das Ich mit gutem willen Vnnd Recht wisse(n) meinen hof In Egerer marckh an der wendern Vnnd hauß beig(er) Anggeleg(en)
Welcher hof dem Edlen Vnnd Ernuesten Amande(n) Chendasten von Zedwitz Zum liebenstain Vnnd dieß Zeit dero von dem durch
leuchtigisten hochgebornen fursten Vnnd herren herren ferdinando Ertzhertzogen Zu Osterreich(en) der Ro(mischen) Kay(serlichen) Ma(ies)t(at) Statthalter Im
kunigreich Behaim(en) (et)c(etera) Meinem gnedigisten fursten Vnnd herren Von dem stifft zu S(anct) Claren In Eger lehe(n) wier Jarlang ver
pfandt, Zinsen Ist an korn funff karr an waitzen ain karr an gersten ain halbs karr an habern gleichfals ain halb karr, Ite(m)
ain ganß Volgend Zway hu(n)er, Vnnd Zwen keeß Auch Zwo katzen steege, Weitter Ist gemelt hof Zwo scharwerckhen pilding schuldig
sunst ledig Vnnd frey mit grundtperen allen recht gerechtigkaiten wie Vnnd Zugehorung allermas sey wie Ich denselben Inne
gehabt genossen Vnnd gepraucht nichts außgeschlossen, das recht Vnnd redlich dem fursichtig(en) Lawrentzen Stadler mein sonen
allen seinen erben Vnnd Erbne(m)er Vmb ain su(m)ma gellts der Ich von Ime bar Vberkhu(m)en wol Zu danckh entricht Vnnd bezallt word(en)
bin Vnnd Ine der gantz quidt entledig Vnnd loß sage Zu kauffen geben Vnnd verkaufft hab Ich mich hiemit Vnnd In Crafft diß
briefs gentzlich Vnnd Ewigclich Ime verzeih Vnnd berauff fur mich alle meine erben das wier vns niemandes Von Wegen
meingedachten meinen abkauffer Lawrentzen Stadler alle seine Erben Vnnd Erbne(m)er obgedachts hof mit seiner Zugehorung
denselben kauffsu(m)ma nach ainhalt diß halbenbriefs Zu ewigen zeiten nimmer betruben anlangen noch Zu sprech(en) Allere
wen(n)er mit rechter macht In kainerlay weiß wie Imer Zuuerdenckhen sein mocht, Sonnder geweren vertretten freyen Vnnd
ledigen wöllen alle diß Egerisch Craiß Recht Vnnd gewonhait Ist Darinnen waren trewen Vnnd glauben an geverde, Vnnd
des Zu Vrkundt so hab Ich obgedachter Caspar Stadler fur mich alle meine Erben Ersamen Erbaren Vnnd Weisen Erh(ard)
Bernhardin schmid Burgermeister Vnnd Iurgen Wasserman deß Raths der stat Eger gepetten das sie Ire angeboren Vnnd Aigen
Innsigl Inne Vnnd denselben an disem brief gehang(en) hab(en) Geben sambtags nach S(anct) Paulus Bekerung tag
Nach Christi Vnnsers lieben herren gepurt In Tausent funffhundert funfftzig Vnnd Neun Jare