Ich hanns Vbelackher zür Vde Bekhenn für mich alle meine Erben, Erbnehmen vnnd nachkhomen, Offentlich an disem brief, geenn manigklich, die disen
brief sehen oder hören lessen, Das wir mit Rechter wissen, Vnnd willen, auf vnsern hof, alda zür Vde, Zwischen der Vogelgesang vnnd Nickl
Manzens höfen gelegen, darauff Jch fast hafft, auff sein gründt, pedem, Ein vnnd Zügehörung nichts außgenomen, Zway star getraidts, halbs korn vnd
halbs habern, Rechs Jherlichs Ewigs zinß, Verkaufft haben, Vnser Erbherschafft Der Erwirdigen vnnd Tügenntthafften Jünckfrawen Anna feiselin,
abtessin vnnd Conuent, Sannt Claren Ordens des Jünckfraw Closters Jn Eger, Vmb Dreyssig gülden, Reinisch Egerstatwerung, derer wir zü vnsern
nüczend frommen, bar bezalt worden sein, Vnnd Jr Erwirden, bemelter Sümma, quit frey ledig vnnd loß sagen, Haben, Recht vnd Redlich
zükauffen geben vnd verkaufft, Alß das wir, vnser Erben, Erbnehmen, vnnd nachkhomen, alle besizer vnnd Jnhaber des bemelten hofs,
Jn Ewig Nimmermehr abzulössen, der obgedachten meiner lieben herschafft, Vnd allen Jren nachkhomen, dem Stifft zü Sannt Claren, wie
obenbemelt, alle Jar Jherlichen vnnd Jedes besunder, Jhrauff Sannt Michels tag, (Züsambt den andern meinen schüldigen, Erbzinsen, als zehen
kreüzer, Ein halben schenckh khes, vnnd zwen keß) Sollen vnnd wöllen, Zway star getraidts, halbs korn vnd halbs habern, anntwurten, vnd raichen,
gen Eger, Jr Erwirden, gewarsam, wie sichs Rechst, Vnnd auf negst komendt Michaelis, nach dato dits briefs, mit dem Ersten zins zügeben,
anfahen, Obes sich aber begabe, das wir oder vnser Erben, vnd nachkhomen, Jn kütz oder lang, mit Ein oder mehr zinsen, Welches
Jar das wer, Vnnd wie offt das gesche, nit zinsten, das Jhe nit sein soll, So hat obgedachte vnser herschafft, güt Recht, vns darumb mechtiglich pfenden
lassen, Jren zins, von vns vnd den bemelten hof, Sampt aller Zügehörungen, bekomen, wie Jr Erwirden, vnnd nachkhomen, verlangt,
Solang vnd weil sie der hinnerstelligen, zins vergnügt vnnd entricht werden, Alles getrewlich zühalten, Bey vnsern gütten trewen,
waren vnd glauben, ohne geuerde, Daß zü warem Vrkündt, stetter, vester, vnd vnzertrennlicher haltung, hab Jch obgenanter Vbelackher,
für mich alle meine Erben, Erbnehmen, vnnd nachkhomen, mit fleiß erpeten, die Erbarn, vnnd weisen, herrn Hansen Schaller, vnnd
Brotzen, Mairl, beide des Gerichts Jn gemelter stadt Eger, das sie Jre angeboren Jnsigl, doch Jnen ohne schaden, an disem brief gehangen, vnd
auf gedruckt haben, Beschehen Montags nach dem Sontag Cantate, Nach Christ vnsers lieben, herren vnnd Erlösers gebürt, Tausent
fünffhündert vnnd Jm drey vnnd sechczigistem Jhare: