JCh Hannß Seseller Burger Jn Eger vor mich alle meine Erben vnnd Erbnemen, Offenlich an Dießen Briff gegen Jeder
menniglich Bekenne vnnd thue kundt, Das ich mitt gůttem willen vnnd rechtem wißen mein Hoffhůn Beßaß
bey Drebendorff Darauff Jtzo Hannß Reine wondt, Zinst Jerlich Zwen hennenn Zwenk Kyeß, Ein halb Schock korn,
von Zwen Roßscharmarck, mehr sonsten hernach bemerkt, mein abteüßern Jtzen Achar halb korn vnd halb ha
bern, Sonsten ledig vnnd frey, vnnd ist mir mitt rechtem herkomen frey Aigenthumb, mitt grůndt Paden
Zinßen Renten Scharwercken, acker gereigkaitten Rechten vnd gerechtigkaitten, nutzungen, Zů vnnd Eingehe
rung, neben Der Erbmanschafft vnnd Den seen, aller maßen Jch solches nach abgangk Achar von mein lieben
eltern Erblich an mich gebracht dasselbe alß aigen Jmmer gehabt genůtzt genoßen vnd gebraucht, nichts
außgenommen oder beuorbehalten, Habe Nuhn Mehrich Erblich vnnd Jn Gůtt Den Erwirdigen vnd andechtig
Ebtißin vnnd Conuent Deß Stifft vnnd Jungfraum Closters, Sanct Clara Jn Eger, allen Jhrern Erben vnd
Nachkommen, vmb Eine Benandte Summa geldes, Die Jhr Erwirden vnnd Andacht mich als balden Barr vber
Zů mein sichern handen außgeczalt, Die ich auch Empfangen vnnd Jnn mein Nůtz angewandt Derwegen Egenan
te Ebtißin vnnd Conuent, auch alle Jhr Nachkommen vnd wer hierin ferner Quittirnd Nottürfftig, ich
hiemitt Jn bester Rechts form Quitt ledig vnnd loß Sage, Zů kauffen geben vnnd verkaufft Deßen ich mich hiemit
gentzlichen thue Vertzeihen, Berede vnd gelobe hierauff vor mich alle meine Erben Erbnemen vnd Nachkommen,
Das wir noch niemandt von vnsernt wegen, Offtgemeltedachte abtißin vnd Conuent bemelts Stiffts Sanct Clara,
alle Jher Erben vnd nachkommen, Jnnberürts Hoffs, Derselben Zůgehörung grůndt Paden Zinßen Renten, ge
reigkaitt, Scharwercken Erbmanschafft oder seen, noch aber Dero kauffsumma halben vmb kein groß wenig oder
viel hinführo Zů ewigen Zeitten nimmer mehr beleidigen anlangen noch besprechen sollen, oder wöllen, mitt
noch ohn Recht gantz Jn kainerley weis noch wege, wie Jmmer Zů Erdenken sein möcht, Sondern hieran
entwern freyen vnd ledigen weren als Der Erbarn Stadt Eger Recht vnnd gewonhaitt ist, Bey meinem
waren ehren Trawen vnd glauben, ohne gefehrde, Zů Vrkundt hab ich vor mich alle meine Erben Erbne
men vnnd Nachkommen, mitt vleiß Erbetten, Die Erbarn vnd weisen Herrn Christoff Steinckernagel vnd
Herrn Hannß Brůner, bede Des Raths Der Stadt Eger, Das sie Jhr Angeborne Jnsigel, Doch Jhnen ohne
schaden Zůgezeugknus an Dießen Brieff haben gehangen, Beschehen vnnd geben Den Eilfften Monats Tag
Juny, Nach Christi vnsers herrn Erlösers vnnd Seligmachers geburt, Ein Tausendtfünffhundert vnd Jm Neun vnd
Siebentzigistem
Jare