Ich Jobst Stöckher zue Schela Bekhenne vor mich alle meine Erben vnd Erbneuen, Offenlich an diesem brieff gegen menniglich, das ich
mit guetem willen vnd wolbedachtem muet, mein Hoff zue Schela, zwischen Nickhel Nörscher, Vnd Veit Wachter heüsern daselbstenn Inne ge=
legenn, zinst Jerlichenn einem Eruirdigenn Vnd Andechtigen Stifft Vnd frawen Closter in Eger, Viere halbe halb Kronen Vnd halb ha=
bernn, Ist sonsten auser schuldiger lossung ledig Vnd frey, mit grundt Vnd boden, allenn Rechtenn gerechtigkhaitenn nutzung ein Vnd zuegehörung alles
massenn, wie ich solchenn Innegehabt, genützt genossenn Vnd gebraucht, nichts außgenommen, Habe Recht Vnd Redlich dem Ersammen Jacob
Adler zue Schela allenn seinen Erben Vnd Erbneuen Vmb ein benandte Summa geldes, der ich Vonn Ime bar Vnd wol zue guetem danckh, entricht
Vnd bezalt wordenn bin, Darumbenn ich Ime Vnd seinen Erben, oder wer sonsten derwegenn guetleins nottürfftig hiemit Vnd In Krafft dises brieffs
Inne gebenn Vnd Vberantwurt, dessenn ich mich gäntzlich vnnd Ewiglichenn hiemit verzeiche, Binde Vnd gelobe mich auch obgedachter Stöckher
Vor mich alle meine Erben Vnd Erbneuen, Das wir nach niemandts Vonn Vnsertwegenn, Obgemelttenn Jacobenn Adler, als Khäuffern
Alle seine Erben Vnd Erbneuen, Obberürttes Hoffs desselbenn grundt bodenn, Kaus zimmer noch anders desselben Innhalts zue Ewigen Zeittenn
nimmermehr beschaidigenn Anlangenn noch besprechenn sollenn noch wöllenn, weder mit noch ohne Recht, gantz in Khainerlay weis noch wege, wie Jmmer
zue erdenckhenn sein möcht, Sonndern gewerenn vertrettenn freyenn Vnd ledigenn wöllenn, Als des Egerischenn Reichtel Recht Vnd gewonhait ist
Bey meinem wahren Trewen Vnd glauben ohne geuerde, Zue Vrkundt hab ich Obgedachter Jobst Nörscher Vor mich Alle meine Erben Vnnd
Erbneuen, mit sonderm Vleis erbettenn, Die Ersamenn Vnd Weysenn Herren Nickhel Riebinger Vnd Thoman Weichsler baide des Raths der
Statt Eger, das sie Jre Insigel, doch Jnen ohne schadenn, zuegezeugnus anndiesenn brieff anhangendt Vffgedruckht, Gescheen Vnd gebenn denn Sechtzehendenn
Monattstag May, Im Fünfftzehenhundert Sechst Vnd Neuntzigistenn
Jare.