WIr Bruder Johans Abbt zeu waldsassen vnd der gantz Conuent daselbst Bekenne offenlich an disem vnsern offen
brieff fur vns vnd all vnser nachkomen allen den die Jn sehen horen oder lesen Das wir mit wolbedachte mut
got dem heren zu lob vnd merung des almechtigen gots dienst in vnser kirchen Redwitz Vnd besunder lieb die wir
habn zeu vnsern lieben dem Rat vnd der gemain des markts zu Redwitz von Jre dienst vnd fleissiger gebet wegn habn
wir Jn gelihen funff hoff vnd den zehent halben mit all Jre zugehorung vnd nuzung nichts hindan gesazt Auß
genomen den drittail czehents des pfarrers in dem dorff zeu Ainzenperg die si gekaufft haben drey hoff von
Nyclas vnd Hanns prantnern gebruder vnd die zewen hoff vnd den zehehent von Vlrich Redmicz zeu eyner ewign
Engelmeß dye gehalden schol werden in vnser kirchen Redwitz zeu hilff vnd trost allen Cristen mensche lebentige vnd
toden vnd mit namen allen den die ir stewr oder hilff zu der selbigen meß thuen habn oder noch thun werden
Mit sulicher vndersthaid als wir sy dann ytzund gelihen haben zewayen ersame manne aus Jrem Rat mit name
Wolffhart Czeidler vnd fridrich Schmiden die obgeschriben nuzung vnser lehen zeu Ainzenperg der benaten Engel
meß trewlichen czehen schullen mit hilff eines Rats vnd gemain daselbst Vnd hinfur ewigklich wenn Jre erben od(er)
Jr nachkomen von der benan meß von todes oder absatzung wegn verwandelt wurden von der benan meß notdurfft
wegen So schullen sy hinfur albeg zewen ander aus Jrem Rat oder der gemain fur vns oder vnser nachkome schicke
das si dye obgenatn lehen von vns oder vnsern nachkomen albeg empfahen schullen dye schullen vnd wellen wir Jn
freuntlichen leihen darumb schullen sy vns nichts pflichtig sein dann was ir guter will ist Si schullen auch hin
fur albeg eynen frumen erbern priester zeu vns oder vnsern nachkomen senden der vnserm vicary zeu Redwitz in
gotlichem dienst noch herkompner seliger gewonhait gehorsam sey Vnd wenn der selbig priester als offt sich das ge
purt oder nottut mit Jrem brieff fur vns oder vnser nachkomen kumbt So schullen vnd wellen wir Jm dye offtgenan
Engelmeß freuntlichen leihen vns vnd vnser kirchen Redwitz on schaden Jnnmaß als andern vnsern Capplan die lehn
von vns haben Vnd das das alles gantz stat vnd vnzebrochen beleib zeu vrkund vnd sicherhait geben wir Jn
disen offen brieff versigelt mit vnserm vnd vnsers Conuents baiden anhangenden Jnsigeln Das ist geschehen
nach Cristi vnsers heren gepurt Als man zalt vierzehenhundert vnd darnach in dem einvndvierzigstem Jar an
Sand Endres tag des heiligen zwelfboten