Wir Wenczlaw von gotes gnaden Romischer kunig zu allen zeiten merer des Reichs vnd kunig zu Beheim
Bekennen vnd tun kunt offenlichen mit disem brife allen den die jn sehen oder horen lesen das wir durch sun
derlicher trewen willen die wir an dem burgermeister Rate vnd Burgern gmeinlichen der Stat zu Eger
vnsern liben getrewen vor langer zeite erfunden haben vnd sunderlichen dauf das sie bey vns furbasmer
deste bas beleiben vnd harren mogen dieselben Burgere ynwoner vnd ynsessen vnd ire guter in vnser sund
lichen schuze vnd schirmen genomen vnd empfangen haben nemen vnd empfahen sie in craft diz brifes
vnd wollen sie ouch bey iren freyheiden gnaden rechten vnd guten gewonheiden die sie von vnsern vorfaren
beide Romischen keysern vnd kunigen vnd ouch kunigen zu Beheim vnd andern fursten redlichen herbracht
vnd erworben haben gnediclichen behalden vnd sie dobey gerulichen beleiben lassen Sunderlichen so meinen
sezen vnd wollen wir was von dem lande vnd der Stat zu Eger entzogen vnd entfremdet ist das von alters
darzu gehort hat wo das hin komen sey das das alles zudemselben lande vnd Stat komen vnd widerbracht
werden solle vnd das ouch alle vnd ygliche brife die daruber gegeben sind wie vnd in welichem begriffe die
steen vntuglichen vnd vnkreftig sein vnd bleiben sollen vnd gegin disen brife keynerley kraft noch macht
haben sollen in dheinweis mit vrkunt diz brifes vorsigelt mit vnser kuniglichen maiestat jnsigel Geben zun
Betlern noch cristes geburt dreyzenhundert jare vnd darnach in dem funfvndnewnczigisten jaren des frey
tages noch sand Mariemagdalene tage vnser Reiche des Behemischen in dem dreyvnddreissigisten vnd des
Romischen in dem tzwenczigisten Jaren
Ad relam B. Strnad de Janowiz
Wlachnico de Weytemmule