Ich petzold schwengil czu der czeit gesessen czu kauritz vnd myn erste elyche haussfraw fraw katheryn
bekennen offenlychin in dysem kegenwtigen brife allen dy in ansehen horen ader lesen daz ich mit
mynes hren hrn albrechtis von bergow rate vnd willen recht vnd redelych habe gekawft czu vnser
beider libe von den erbern geystlychen herren von hrn ludken von essen czu der czeit lanthompt czu
behem vnd czu merhern vnd hrn dytrich von schonerg czu der czeit kompt czu kumatow vnd von dem
gantzen couent der hren da selbest pezelwitz daz dorf mit allem czinse als in pfennig czinse in getreid in hun
rey in eyern vnd in ander dingen daz alles ab gelde geslagen ist in achtczehen schok czinse vnd mit allen rechten
vnd gerichten mit allen nutzen vnd vreiung mit allen reynen vnd eckern vnd mit allen seinen czugehorenden dingen
beide groz vnd kleine czu besitzin vnd czu haben czu meinc vnd myner hussfrawen libe rechte als ez dy vorgenaten
hren besessen vnd gehabt haben vzgenomen eyne frey hube ackirs dy do blibet by dem hause czu kumatow vmb
hundert schok vnd funf vnd dryczik schok iser pragscher pfennige dy ich in gantz vnd gar begalt habe
Ouch zo sal ich egen petzold vnd mein fraw frei vnd ledig sein an allen guben von des vorgesrieben dorfs vnd
czins wegen Sunder wen eyn lantpern geet zo sal ich ader myn fraw von dem dorfe vnd gute stewren also als
iz vor gebawet hat vnd den hern sal ich ader mein fraw nemen vnd antwrten in in daz hauz czu kumatow ane
hindernis vnd widervrede Ouch weris sache daz ich oftegen petzold e abeginge vnd vorsturbe den mein fraw
katheryn zo sal sy dy gewalt haben daz sy hern cuntzen von loom mag seczen vnd kisen czu eyme vormund
ap der nicht enwere zo mag sy seczen derung von loom hrn cuntzen bruder Wen aber got gebeut ob mich pet=
zold vnd ober kathryn mein erste elychen haussfrawen also daz wir beide von diser werld musen varn zo sal daz
egenate dorf pezelwitz mit den leuten vnd mit dem borgen czinse vnd mit allen rechten vnd gerichten mit frei
heit vnd mit nutzen vnd mit seine czugehorenden dingen wider vallen an dy oftegenanten herren vnd
an daz czu haus czu kumatow an allerleye argelist hinderniss vnd widervrede Also daz vns erben
noch vns herre her albrecht von bergow zullen noch mugen nach vns beider tode nimer mer
kein anspruche noch forderunge gehaben vm des vorgesprochen dorfis vnd czins willen Daz selbe
bekenne wir ouch her albrecht hie czu bergow mit in in dysem kegenwtigen offen brife Ouch
zo sal ich petzold ader myn fraw gantz macht kraft vnd wollenkomen gewalt haben dy weil wir
leben czu tunc vnd czu lasen mit alle den egen dorfe leuten vnd mit dem czinse in allen sachen
als in vnsim rechten gute doch nicht czu vorsetzen noch czu vorkaufen Weris auch daz der oftge
naten hren leute von kumatow mit meinen leuten ichtis czu schaffen hetten dy zullen ir recht vornin vnd
meiner frawen suchen in dem egen dorfe mag in do nicht eyn recht wider varn zo mugen sy vns
zullen vns leut dorvmb vfhalden Daz dise vorgesrieben rede vnd kauf stete vn vnzubrochen
gehalden werde zo hab ich czu eyne vrkund vnd geczugniss mein ingesigel mit meines hren von
bergow ingesigel an disen offen brief gehangen ouch zo hab ich gebeten dy erbern vnd wysen manne
dy schepphen von der stat czu bruks daz sy ouch irer stat ingesigel mit hern cuntzen von loom
ingesigel durch grosser sicherheit willen in disen kegenwtigen brief haben gehangen Der gegeben
ist nach gotis geburte dryczehenhundert jar an dem eyn vnd sebenzcigsten jare an dem andern
tage mensis maij