Wir Karl von gotes gnaden Romischer keyser zu allen zeiten merer des Richs vnd wir Wenczlaw von denselben kunig zu Beheim marggraf zu
Brandenburg vnd Herczog in Slesien fur vns vns(er) erbn vnd nachkomen kunige zu Beheim bekennen vnd tun kunt offenlich mit disem
briefe allen den die in sehen odir horent lesen Wann vns(er) liben getrewen die Richter Scheppen Burger vnd gemeinde der Stete Prage Chutten
Tachow vnd Tust fur vns mit vns gelobt habn vnd ir briefe gegebn dem hochgebornen Otten pfalzgrafen by Reyn vnd Herczog in Beyrn
vns(er)s vorgenan(ten) keys(er) Karls liebem Eydem Son vnd fursten vnd synen erbn mannes geslechte das wir yn die wochengelte der Sechczik schok
grosser prager pfenninge alle wochenntlich von disem jare vnd darnach dreytausent schok grosser derselben pfenninge furbas alle jerlich uff
sant michaels tag gebn vnd bezalen sullen in sulcher masse als volkomelicher usweysen die briefe die wir vns(er) sy darubn gebn haben
Des gelobn wir den egenan(ten) Richtern Scheppen Burgern vnd gemeinden der Stete Prage Chutten Tachow vnd Tust inen erbn vnd nach
komen das wir sie alle gemeinlich vnd besund(er) von sulchem gelubden an allen iren schaden brengen sullen vnd welln vnd des zu merer
sicherheyt so gebieten wir Jossel Rotleiben vns(er)m munzmeister uff dem perge zun Chutten vnd liebm getrewen vnd wer in zeiten
vns(er) munzmeister doselbst wirdet ernstlich vnd vestiglich bey vns(er)n hulden das sy von vns(er)n wegen dem egenan(ten) Herczogen Otten
vnd synen erbn mannes geslechte sulches vorgenan(te) wochengelte vnd dye dreytausent Schok jerliger gulte von vns(er) vrbar vnd
munze uff dem perge zun Chutten vnd von den nuczen Renten vnd gewelln die von derselben munze vnd vrbar gevallen zu voran
bezalen sulle on hindernisse vnd das sie auch vnd ir iglicher den egenan(ten) vns(er)n Steten ir briefe gebn mit iren anhangenden Jnge
sigeln derynne sie sich vorpinden vnd gelobn sulches obgenant wochengelte vnd auch jerige gulte zu voran bezalen von den
egenan(ten) munze vrbar vnd allen renten vnd nuczen die doran gevallen zu vrkund ditz briefes versigelt mit vns(er)n grossen anhan
genden Jngesigeln der gebn ist zu Prage nach Cristes geburte dreyzehnhundert jar darnach in dem dreyundsibenczigsten jare an dem
nehesten dinstage vor sant Gallen tage vns(er)s keys(er) Karls Richs in dem achtundzwainczigsten vnd des keisertumbs in dem newnzenden
jare vnd vns(er)s egenan(ten) kunig Wenczlaws Richs in dem Eylften jare

Per d(omi)n(u)m d(e)c(anu)m pragen(sem)