Allerdurchleuchtigster Großmechtiger furst vnnd Herr Euer kunigklichen Maiestat seyen vnnser vnnderthenig
schuldig gehorsam vnd willig dienst diemuttigklich vnnd mit allem fleyß zuuoran berait Allergenedigster Herr
welch massen vnnser Rats freunndt paulus Beumscherr seine beschwerden an vnns gelangt das vbersenden wir euer kon(iglichen) Ma(ies)t(at) hierjnn
verwart vnnderthenigst zu Vnd wöllen nit zweyfeln euer Ma(ies)t(at) gemuet vnd maynung sey nit das die jhenen so vor beschluß euer
kon(iglichen) Ma(ies)t(at) ordnung mit yemand der Cron Behem zugehörigen getrahut vnd beschlossen gehindert werden sollen So wir dann
bey genanntem vnnserm Rats freunndt befinden das sein beuelchaber vor auffrichtung der ordnung vmb sollichen Salpeter ge
schlossen vnd darauff etlichen den vnnserm vertrostung than Jnen denselben auch vmb zimlichen preyß volgen zulassen So langt
an euer kon(iglichen) Ma(ies)t(at) vnnserm allergenedigsten Herrn vnnser vnnderthenigste bit Euer kon(iglichen) Ma(ies)t(at) geruehen allergenedigst jnbeuelh
vnnserm Rats freunndt an seinem kauff vnuerhindert zulassen Vnd wöllen dannocht euer Ma(ies)t(at) hierneben nit pergen das sich diser
vnnser Rats freunndt als vnnsers zeughauß vnnd kriegsstuben verordenter beuelchaber ainer ye vnnd allwegen jn furfallend
der Römischen kay(serlichen) vnnd euer kon(iglichen) Ma(ies)t(at) notturfften so die an vnns gelangt ganntz willig vnd vnuerdrossen erzaigt vnd
bewysen hat der vnnderthenigsten zuuersicht euer kon(iglichen) Ma(ies)t(at) werden sich hierjnnen allergenedigst gegen Jme erzaigen vnd
Jme dise vnnser furbit zu gutem kumen lassen das wöllen wir vmb euer kon(iglichen) Ma(ies)t(at) jn aller vnnderthenigkait verdienen
Datum Sambstags vij July Anno (et)c xliij
Euer kon(iglichen) Ma(ies)t(at) vnnd des
Heyligen Römischen Reichs
Getrewe vnnderthenen
Burgermayster vnnd Rath
zu Nurmberg