Wir Wenczlaw von gottes gnaden Romischer kunig zu allen zeiten merer des Reichs vnd kunig zu Beheim Bekennen vnd thun kunt offenbar mit disem briue allen den
die In sehen ader horen lesen Das fur vns kumen sindt vnser libe getreuen Erhart Nicklas vnd Hans dy forster vmb vnser mayestat briue vber ein Suma geldes nemlich
dreyhundert schock grosser prager Muncz Die wir In fur Ir dinst vnd schaden schuldig pleiben vnd Ine vor verschiener zeit entricht solten haben des haben wir Ange
sehen nutze vnd trewe dinste Die sie vns vnd der kron zu beheim offte getreulich gethan vnd furpas dester williger thun sollen vnd mugen In kunfftigen zeiten
vnd haben darumb mit wolbedachtem mute gutem Rate vnser Edeln vnd getreuen vnd Rechter wissen vnserm liben getreuen Nicklas forster vnser vesten kunspergk
mit aller herlikeit vnd Obrickeyt eyngegeben vnd verpfendt geben vnd verpfenden Ime die In krafft dits briues vnd kuniglicher macht zu beheim Also das er
vnd sein erben vnd nachkomen dy genanten vesten Vnd nemlich den Marck mit seiner zugehorung vnd auch mit den visch dinsten wiesen welden
vnd aller seiner zugehorung vor an die sindt nichts außgenomen haben halden besiczen der geniessen vnd geprauchen sollen vnd mugen von vns vnnd
vnsern nachkomenden kunigen zu beheim vnd sunst von allermenniglich vngehindert Auch soll er vnd sein nachkomen die diesen briue mit seinem gutem
willen Inhaben der selben vesten nymandt anders abtreten dan so wir ader vnsere nachkomende kunige die zu vnsern aygen handen losen vnd geprauchen
wollen vnd des zu widerstatung haben vns die selben forster an der obemelten Suma anderthalbhundert schock nachgelasen vnd die obern anderthalb hundert
schock grossen schlagen wir Ine auff vnser vesten kunsperg So sie dan der bemelten anderthalbhundert schock grossen von vns ader vnsern nachkomenden kunigen
zu beheim vollig an gentzlich entricht sein So sollen sie vns vnser vesten lediglich wider abtreten vnd vns kein ander schaden dar auff schlahen Auch soll
der gnant Nicklas forster sein Erben Oder wer diesen briue mit seim gutem willen In hat nymandt anders mit der gnanten vesten Sampt dem Marck
vnterworffen ader gewertig sein dan allein vns vnd vnsern Nachkomenden kunigen zu beheim zu vnsern kuniglichen geschefften vff vnser kostung vnd on Irenn
schaden Auch sollen sie vns mit dinsten verwandt sein Als ander Inhaber vnsser kuniglichen schlosser Dar auff gepieten wir allen von kunspergk was
stands die sindt ernstlich vnd vestiglich Das sie dem gnantem forster seinen Erben vnd Inhaber vnser vesten gehorsam vnd hulden sollen Ine gehorsam
vnd gewertig sein mit der vollig dinsten zinsen zehenten vnd vnsern kuniglichen stewern auch sie auffzunemen vnd zu Entseczen des wir Ine mit
aller obrickeit vergonnen vnd vns hier Inen nichts empsig behalten Vnd gepieten darumb allen vnd yglichen vnsern Burggrauen freyen heren Rittern
knechten Amptleuten Richtern Burgermeistern Reten Gemain der Stete Merckte vnd Dorffern vnd sunst allen andern vnsern vnd der kron
zu beheim vnterthanen vnd getreuen Ernstlich vnd vestiglich mit dem brieff Das sie den vorgenanten Nicklas forster sein Erben vnd Nach
komen an solcher vesten kunsperg vnd dem Marckt mit aller Irer zugehorung nicht hindern noch Irren sollen In kainerley weis Als lib ainem
yden sey vnser swere vngnade zuuermeiden Zu vrkunt dits briues versigelt mit vnserm kuniglichen Maiestat Insigell Gebenn
zu prag Nach Cristi gepurt vierzehenhundert Iar Vnd darnach In dem Achten Iare Am Sant Mathestag vnser Reiche
des Behemischen Im Sechsundzwainczigsten Vnnd des Romischen Im zweyunddreyssigsten Iaren