WIr Jorig von gots gnaden Kúng zcu Behem Marggraff zcu Merhern Herczog zu Luczemburg vnd Slesi
vnd Marggraff zcu lusia Bekennen vnd tun kund allermeniglichen Das fur vns komen sind die erbarne vnd lantschaft
zcum Ellnbogen vns lieben getrewen vnd haben vns diemutigclich gebeten daz wir In vnd allen Iren nachkomen alle vnd ygli=
che Ire gnad freiheit recht hantuestn briue priuilegia vnd gute gewonheit die In gegeben sind von Rómischen keisern vnd kúnige
zcu Behem vnsern vorfarn zcuuernewen zcuconfirmiren vnd zcubestetigen genedigclich geruchten Also haben wir angesehen
Ire diemutige vnd redliche gebete vnd betracht getrewe vnd aneme dinst die sie vns hie widern vnsern ergemelten vorfarn vns
vnd der Cron zcu Behem offt vnd dik willigclich vnd vnuerdrossenlich getan haben teglich tund vnd hinfurtan sullen vnd mu=
gen in kúnfftigen zeiten Vnd haben darumb mit wolbedachte mut gutem rate vnd rechter wissen In vnd allen Iren nachkome(n)
alle vnd ygliche Ire gnade freiheit recht briue priuilegia hanttuesten vnd gutegewonheit die In von den egenanten Rómisch(e)n
keisern vnd kúnigen zcu Behm vnsern vorfarn vnd auch darau Ire alte gute gewonheit vnd herkomen die sie redlich herbracht
haben in allen Iren stucken puncten artickeln vnd begreiffungen wie dann die lauttend vnd begriffen sind genedigclich vernew=
et confirmiret vnd bestettiget vernewen confirmiren vnd bestettigen In die von kúniglicher macht mit vnd in crafft diczs
briues Vnd meinen seczen vnd wellen daz sie furbasmer alle mechtig vnd crefftig sein vnd sie auch dabey bleiben vnd der an al=
len enden gebrauchen vnd geniessen sollen vnd mugen gleicherweisse als ob sie alle von worte zu worte in disem briue begriffe(n)
vnd geschriben weren von allermeniglich vngehindert Darumb gebieten wir allen vnd yglichen vnsern vnd der Cron zcu Behm
vndertanen in was wirden statt vnd wesen die sein ernstlich vnd vestigclich mit dem briue das sie die vngenanten erbarn vnd
Lantschafft zcum Ellnbogen vnd Ire nachkomen an solichen vorgenanten Iren gnaden freyheiten rechten briuen priuilegien
hanttuesten vnd guten gewonheiten furbas nicht hindern noch Irren sollen in dhein weise Sunder sie dabey von vnsern vnd der
Cron zcu Behem wegen hantthaben schúczen vnd schirmen vnd geuerulichen bleiben lassen Als lieb In sey vnser swere vngnad
zcuuermeiden Mit vrkund diczs briues versiglt mit vnnserm kúniglichen anhangunden Insigl Geben zcu Prag am Sunn=
abend vnnserr lieben frawen tag Conceptionis Nach Cristi gepurd Virczenhundert dornach in dem Neunundfunff=
zigisten vnd vnsers Reichs im Nunden Jaren
Ad mandatum d(omi)ni Regis
Procopius de Rabenstain can(cellarius)