Wir Iorge von gots gnaden Kunig Zu Behemen vnd Marggraue zu Merhern Herczog zu Luczemburg vnd Slesien vnd Marggraue zu Lusicz
Bekennen offinlich mit dem briue Als der Edel vnser lieber getrewer Mathes Slik von lasan herre zur Weyskurchen zc von sein Wenczeln vnd Sigemunden
gebrudere auch hern zur Weiskirchen vnser lieben getrewen seyner vettern wegen von aufuederung des kuniglichen Zens vnd stewre So sie in irer v(er)schreibung
habn vnd von keyser Sigemunden kunig zu Behemen vns(er)m vorfarn loblichs gedechtnuss doruber ausgangen ist mit den Lehenmannen den Steten vnd Inwo=
nern des kreis Elbogen vns(er)n lieben getrewen in spenne vnd zwitracht ist komen der sie dann von beyderseit sy rechtlichen dorauß zuentscheiden auf vns
gangen sind vnd wann wir nu das recht sie also domit zuentscheiden fur vns genomen hetten Had vns bedewcht die gutlichkeit besser vnd von des wegn
das der egenant kreiß nicht beswert sunder vnser gnade mit geteilt werde Auch zukunfftig desterbaß zugenemen muge Vnd dorumb mit wolbedachtem
mute gutem rathe vnser rethe vnd rechter wissen vnd auch mit beyder obgnen(ten) teyl willen sprechen seczen vnd ordn(en) wir zwisschen in in der gutlichkeit also
das die vorgenanten Manne Stete vnd Inwoner dreyczehenhundert schog groschen Innee zweyer Iares frist nechst noch gebunge dicz briues ausrichten vnd
geben die dann zu nucz vnd fromen dem Sloß Elbogen angeleget werden sullen dobey so haben wir in diese sunder freiheit vnd gnade gethan begnaden vnd
freien sie von kuniglicher macht in crafft dicz briues also das sie Aller kuniglichen Zens vnd stewre nu hinfur zu ewigen czeiten vns vns(er)n Erben vnd nochkomen
den kunigen auch den egenanten Mathesen seynen vettern allen iren erben vnd nachkomen zu geben nicht pflichtig sein sundern vnanfodert bleiben sollen Es sei
dann das wir vnser erben vnd nochkomende kunige zu Behemen sulch obgenant zens vnd stewre mit iren willen gehabn mugen vngeuerde doch so sol die vor
genante verschreibunge keyser Sigmundes vnsers vorfarn seliges gedechtnuß gancz krefftig vnd mechtig sein vnd bleiben vnd die mergemelten Mathes seyne
vettern alle ire erben vnd nochkomen der in aller irer begreiffunge verbyndunge vnd meynuge gebrauchen vnd gniessen sollen vnd mugen von vns vns(er)n erbn
vnd nochkomenden kunigen vnd sust allermenglich vngehindert nur alleyne des artickels den vorgn(an)t(e)n kuniglichen Zens vnd stewre vorlautende des sollen
sie noch nymandes von iren wegen zueWigen czeiten nicht gebrauchen noch den furnemen in keynen weg Wann wir den mit diesim vnserm briue abge
than wollen hann Alle geuerde vnd argelist genczlich hirinn außgescheiden Mit vrkunde dicz briues versigelt mit vns(er)m kuniglichem anhangendem Insigl
Geben zue Topplicz am Sonnabende vor dem Sonntage Oculi Nach crists gepurt Vierzcehenhundert vnd dornoch Im einundesechczigisten Vnsers reichs im drit=
ten Iare
Ad mandatum d(omi)ni Regis
Procopius de Rabenstain Cancell(arius)