Wir Ieorg von gottes genadn kunig Zubeheim Marggraue Zu Merhern Herczog In der Slesien vnd luczemburg vnd Marggraue Zu Lusacz Bekenne
offenlich mit diesem brief vor allermeniglich das wir mit gutem Rate vnnsere Edelen vnd lieben getreue die Man Stet vnd alle Inwoner
vnnsers kreys Elbogen vnnsers lieben getreue der kuniglichen steur vnd stewer gefreyet habn nach laut vnd außweysung eins briefs den wir In
daruber gegeben haben vnd vmb solch freyheit sie auch Dreyczehenhundert Schock gebn sollen das andere gut vnd nuczung Zu vnnserm Sloß El
bogn gekaufft mochtin werden alß wurden von vns den genaten bimen steten Zu Rate vnd lossen von Albrecht Malesicken vnnserm liebn getreue
vnnser Sloß Hertenberg auch In dem Elboginischem kreys gelegn das Im dan von vnnserm vorfarn kunig Wenczln loblicher gedechtnuß verschribn
was Zu solicher ablosung vnns der Edel vnnsers lieber getreuer Mathes Slik von lazan her Zur weyßkirchn Sibenhundert Remisch gulden ge
lichn hat derweyssen alß wir die obgemeltn Man Stet vnd Inwoner vnnsers kreys Elbogen vmb solch obgenat Dreyczehundert schock grostn
auch Zu solicher ablosung gein dem gemelten Malesicken das sie Im darvmb sein willen vnd genug machen vnd außrichtung tun solten das
sie dan alß getan haben Darumb mit wolbedachtem mute vn recht wissen so sagen wir die egenante Man Stet vnd Inwoner des kreys Elbogn
solher Dreyczehundert Schock grostn Quit ledig vnd loos fur vnns vnnser erbn vnd nachkome kunig Zu Beheim vnd habn vnns darnach
auch mit Rat der mergemelte vnnser Rete eins erblichn freymarckes vnd wechsels vereint vnd vertragen mit dem obgenanten Mathes Slikn
vnd seine vettern ir Alß das wir In Hertenberg das Sloß mit aller seiner Zugehorung vnd Zweytausent gulden Remisch der wir sie auf vnserm
Sloß Elbogn vergnugt vnd versichirt habn nach außweysung eines brieues In von vnns daruber gegebn vmb ir Sloß Neydeck lichtenstat
vnd alle hofe pfluggepew dorffer Teuch welde vnd alle Ire Zugehorung mehr außgesaczt vnd vmb die Sibenhundert gulden Remisch die
sie an der losung als obgemelt ist Zu Hertenberg dargelichn habn Begeben Vnd solh obgemelt Sloß Neideck vnd lichtenstat mit allen
vnd Iglichen obgenanten Iren gutern vnd Zugehorungen mehr außgenumme von fur vnns vnnser erbn vnd nachkome kunig Zu Beheim
nun Zu vnnserm Sloß Elbogen geslagen habn vnd In vnd mit Crafft dicz briefs darzu Slahen also das das vor solher obgemeltn kuniglichen
steur vnd steuer nach dem wir die mergenantn vnnser Man Stet vnd Inwoner des kreys Elbogn der gefreyet haben dabey vnd dafur
Beleyben sol vngeuerde Mit vrkundt dicz briefs versigelt mit vnnserm kuniglichen anhangenden Insigel Geben Zu Prag am Sontag
nach der heylign Eylfftausent Junckfrawe tag Von Cristi gepurt vierczehenhundert vnd Darnach In dem Zwer vndsechczigisten vnnsers
Reichs Im funfften Iare
Ad mandatum
Domini Regis