WIr Mathyas von gots gnaden zu Hungern zu Behmen Dalmacien Croacien (etc) kunig Marggraue zu Merhern Herczog zu
lucemburg vnd in Slesien Marggraue zu lusacz (etc) Bekennen offenelichn mit disem brieff vor allen dy In sehen ader horen lesen das vns dy Ersamen vnser vnd der Cron zu Behmen
liebn getrewn Burgermeister vnd Ratman vnser kuniglichn stat Budissin durch Ire Erbar botschafft diemutiglich ersucht vnd bitten haben lassen das wir In vnd Irer gemeyn arm vnd reich
alle vnd ygliche Ire brieffe priuilegia gnadn gunst lehen handfestn freiheiten gutte gewonheiten gerichte zolle dorffer zinse welde holzer possche weiden Teiche vnd alle ander Ire
genisse vnd herlichkeite dy sy von den Marggrauen von Brandenburg seliger gedechtnisz vnd dornoch von kunig Johann kaiser Karl kunig Wenczlawn kaiser Sigmund kunig laszlawn
allen milder gedechtnis vnser vorfarn vnd von andern kunign vnd furstn vnd von Irn Amptleutn vnd voiten zu Budissin loblich herbracht vnd erwurbn habn zu confirmirn vnd zu
bestetign als ein kunig zu Behmen gnediglichn geruchen Also habn wir angesehn solch Ir mutiglich vnd fleisige bete auch den steten trewn dienst den sy vns auch vnsern vorfarn kunign
vnd der Cron zu Behmen offt vnd dicke getan vnd sunderlich Iczund In disen cristnlichn kriegn wider dy keczer sich gar fleissig beweist vnd erzaigt haben vnd habn In dorumb alle vnd
ygliche Ire vorgenanten brieffe priuilegia gnaden gunst lehen handfestn freiheitn gutte gewonheitn gerichte zolle dorffer zinse welde holzer possche weiden Teiche vnd alle ander
Ire genisse vnd herlichkeite wie dy namen gehabn mugn dy sy loblich herbracht vnd erwurbn haben von den obgenantn Marggrauen von Brandenburg vnd den vorgenanten vnsern vorfarn
kunign zu Behmen vnd Irn Amptleutn vnd hoiten zu Budissin von behmischer kuniglicher macht gnediglich confirmirt bestetigt Confirmirn beuelhen vnd bestetign
In dy auch alle vnd iglich besunder In vnd mit crafft dises vnsers kuniglichn brieffs das sy dobey geruglichn bleibn vnd der aller vnd iglicher genissn vnd gebrauchen sollen vnd
mugen von niemglichn vngehindert Vnd gebietn dorumb allen vnd iglichen furstn geistlichn vnd weretlichn Grauen freyen herrn Rittern knechtn stetn vnd gmein vnd allen
andern vnsern vnd vnser Cron zu Behmen vndertanen vnd sunderlich vnsern hoiten zu Budissin dy yczund sein ader In kunffttign zeitn sein werdn ernstlichn vnd festiglichn mit disem
vnserm kuniglichn brieffe das sy dy obgenantn vnser burger vnd dy stat zu Budissin bey den obgemeltn Irn brieffn priuilegien gnadn gunstn lehenn handfesten freiheitn guttn
gewonheitn gerichtn zollen dorffern zinsn welden holzern posschn weiden Teichen vnd allen andern Irenn herlichkeitn vnd genissn geruglichn bleiben lassen vnd sy doran
nicht Irren noch hindern sollen In dheinweise als lieb In sey vnser swere vngenad zuuormeidn Mit vrkund dises brieffes versigelt mit vnserm kuniglichn anhangendem
Insigel Gebn zu Brün am dinstag In heiligin osterlichn tagn Noch cristi geburd vierczehenhundert vnd Im einvndsibenczigstn Vnser reiche des hungerischn Im
vierzehendn vnd des Behmischn Im andern Jarenn

Ad(manda)ta d(omini) R(egis)
St(ephanus) p(rae)p(ositus) Scepus(iensis)