Ich Albreht weilent willemans sun von dychach dem got genade verich offenleich an disem brief
fur mich vn(d) alle mein Erben vn(d) tůn chunt allen den die in sehent oder horent lesen, Daz
Chůnrat salz dem got genade mein průd(er) mit meim(e) wort vn(d) willen vn(d) mit and(er)
sein(er) gůten freunde rate auz sein(er) tail der wisen dev vnser reht aigen ist vn(d) ist ge
legen in der Obren Owe ze naest pey der Oge Die weilent d(er) Alte Aengs von vns
vmb ain zins hat gehabet auz sein(er) halbtail der selben wisen besůcht vn(d) vnbesůcht er
pawen vn(d) vnvepawen vn(d) auz allen den rehten vn(d) nůtzen vn(d) der zů gehort hat d(er) vor
genant Chůnrat durch got vn(d) durch sein sel willen vn(d) durch aller sein(er) vord(er)n
sel haib willen Der ersam(e)n layenprůdschaft ze Oehsen vn(d) allen irn nahchomen
auz d(er) vorgenant(e)n halben wisen vier pfunt pn(e) geltz ewikleichen geaigent geben
vnd geschaffet Daz si sein(er) sele vn(d) aller sein(er) vord(er)n sel da von gedench(e)n sůlen
vn(d) sol auch in aller der gůtet sein an der vorgenante(n) průdschaft ewikleiche(n) ge
tůn w(er)d(e)n vn(d) da von sol dev vorgenant layenprůdschaft vn(d) alle ir nahchome(n) die vor
genante(n) vier pfunt pn(e) geltz auz der vorgenante(n) halben wisen ewikleiche(n) haben vn(d) niez
zen wende(n) vn(d) chern vn(d) allez daz der mit tůn vn(d) lazzen daz si waenent daz in nůtz vn(d)
gůt sey vngeengt vn(d) vngeirret von mir vn(d) von allen vnse(r)n Erbe(n) vn(d) von aller maen(n)k
leichen vn(d) man sol d(er) průdschaft vn(d) alle(n) irn nahchome(n) die vier pfunt pn(e) auz d(er) vorge
nante(n) halben wisen allew jar vn(d) jaerkleichen geben vn(d) diene(n) ze dem(m)e die wiese in(n)ne
hat auf die zeit vn(d) zil als man(n)s von reht geben sol vn(d) ich vorgenant(er) Albreht vnd
alle mein Erben sůlen d(er) průdschaft vn(d) aller ir nahchome(n) vmb die vier pfunt pn(e) geltz
auz der halben wisen reht gew(e)r sein fur rehtez aigen daz in der chaine jare niht sol
ab gen an all(er) der stat wa man sein bedarf vor Gaystleichem vn(d) vor w(er)ltleiche(n) rehten
vn(d) nach landes reht an allen irn schaden vnd des ze ain(er) vrchůnd der warhait han
ich vorgenant(er) Albreht fur mich vn(d) alle mein Erben mein Insigel gehengt an disen
brief vn(d) sint sein auch gezeug hans der probstes sun fraentzle mein vet(er) albicht
vor dem Tor Albreht der haen(n)nle wieland der schreyb(er) vn(d) and(er) erb(er) leut die da ware(n)
Ditz ist geschehen ze Oehsen do von Christes geburt v(er)gangen waren Dreuzehe(n) hun
dert jar dar nach in dem Ahtoden vn(d) vierzcigistem jar an sand Barthlomes tag