Wir Wladislaus von gots gnaden zu Hungern Behem Dalmacien Croacien etc. Kunig Marggraue zu Merhern Hertzog zu Lucemburg vnd in Slesien
Marggraue zu Lausitz etc. Bekennen vnd thun kundt allermeniglich das wir hochlich ansehen vnd betracht auch aus sonndern vnnserm kuniglichen gnaden geneiget
vmb der angenemen dinst willen die der hochgebornn furst herr Georg Marggraue zu Brandenburg etc. vnnser lieber Oheim vnd Swesterson (ytzt ein zeithere an vnnserm kunig
clichen hofe vnns vnnserm kunigreichen vnd lannden In rechter trew gethan noch thut vnd kunfftigclich mit leib vnd guet zuthun erbeut Demnach aus solicher lieb vnd angeheffter
freuntschafft die wir zu seiner lieb tragen vnd vmb seines trewlichen verdiennens willen die zubelonen auch seiner lieb mit vnnser kuniglichen hilff vnd erstattung pillichen zuer
scheinen auf das sein lieb vnns hinfur desterbas gediennen muge Haben wir seiner liebe vnd allen seinen Erben vnd nachkomen alle vnnser gerechtigkait so nach abganngk des
Hochgebornnen Johannsen in Slesien hertzogen zu Oppoln vnnsers Oheim fursten vnd lieben getrewn Nemblich was an demselben furstenthumb zu Oppoln an vnns als
kunige zu Hungern vnd Beheim auch hertzogen in Slesien Rechtlich kumen vnd gevallen wirdt nichts daran ausgenomen genedigclich gegeben vnd verlihn Geben vnd ver
leihen seiner lieb solh vnnser gerechtigkait an dem bemelten furstenthumb hiemit in krafft diss briefs aus Hungergischer vnd Behemischer kunigclicher macht vnd als ein hertzog in
Slesien Also vnd mit der beschaidennhait Wann es nun zu dem fale kumbet das solh vnnser gerechtigkait an dem furstenthumb nach des obgenannten hertzog Johannsen todt an
vnns geuellet So wellen wir die wale vnnder den zwayen furstenthumben Glogaw vnd Oppoln vor behalten haben vnns der ains fur vnnsern liebsten Son Hertzog Ludwigen erwelen
vnd behalten Darnach welchs seiner lieb seinen Erben vnd nachkomen in solicher gestalt von vnns emgegeben wirdt Als wir vnns dann dess verwilligen vnd von stundt nach des
obgemelten hertzog Johannsen tod hiemit krafft diss briefs gethan wellen haben Es sey das zu Oppoln als ein rechter anfall oder das annder zu Glogaw gelychs mit aller seiner
Zugehorung nichts dauon ausgenomen noch hindangesatzt wie das hertzog Johanns Innegehalten vnd wir selbs Innehaben mochtin In solicher mass vnd form soll der obgemelt
vnnser lieber Oheim vnd Swesterson sein Erben vnd nachkomen der zwayen furstenthumber ains Einnemen Innehaben nutzen niessen vnd gebrauchen vnd damit zuthun vnd
zulassen als mit annderm seiner liebe aigenem guet an vnnser vnnser nachkomen kunigen vnd sunst meniglich von vnnsern wegen Irrung vnd hindernus Doch vns vnd vnnsern
kronen an frendinsten vnd lehennspflichten was dauon Rechtlich vnd pillich zuthun ist anschaden Bebieten darauf allen vnnsern fursten geystlichen vnd weltlichen
Prelaten herren Ritterschafften mannschafften den von Stetten vnd allen anndern vnnsern vnnderthanen was stanndes wirden oder wesens die sein hiemit ernstlich vnd
vestigclich vnd wellen das sy den obgenannten vnnserm lieben Oheim vnd Swesterson sein Erben vnd nachkomen bey diser vnnser kunigclichen begnadung vnd gabe wie oben
angetzaygt trewlichen haltet schutzet vnd schirmet vnd dawider nicht thuet noch anndern zuthun gestattet bey vermeydung vnnser vngnad vnd swerer straff Zu Urkundt
mit vnnserm kunigclichen anhangenden Insigel besigelt Geben zu Ofen Sonntags vor vnnser lieben frawen tag Irer geburt Nach xpi geburt Tausent funffhundert
vnd im Sibenden Vnnser Reiche des Hungerischen im Sibentzehenden vnd des Behemischen im Sibenunddreyssigisten Jaren
Wladislaus Rex
manu p(ro)p(ri)a