Wir Dytherich von alamstorf bekennen an disem offen brife alle den dy yn sen adir horen lesen daz wir in gutem willen vnd mit bedachtem mute
recht vnd redlich habin vorkauft eyn schok groz zinses an dem Czsasslaw gelegen mit gerichte vnd mit allem rechtem als wir is gehabt habin
mit cleynem vnd mit grozem vmme acht schok groz pragscher phfenge hanken plabnern burgere an komathaw vnd sinen Erbin vnd der vorge=
nante zins sol geuallen halp vf sente michahel tag der nu neste an komftik ist vnd halp vf sente walpurg tag d(er) danach neste komet also
sol is sin alle yareglich vnd wir habin dy leute an hanken vnd an sine Erbin gewyst in dem zinse als recht ist dy sullen als gut recht habin in vnsem teyle
waldes als si by vns gehabt habin vnd ab hanken adir sine Erbin keynerley sache an trete von des vorbenaten zins wegen is were in geystlichem gerichte adir
in werltlichem adir wo von is were daz gelobe wir im zu entweren mit vnsem gute vnd nicht mit dem sinen auch habe wir den vorbenaten zins vorkauft
mit sulcher vndirscheyt wenne vns got gut beschert vnd wir an hanken kumen adir an sinen Erbin so sol her vns daz vorbenate schok zinses widir
zu kaufen gebin vmme dy vorbenatin acht schok groz vnd vf welchen tag wir den zins widir kaufen so sol ir der neste zins danach an hanken vorvaln
vnd an sine Erbin vnd mochte wir daz vorbenante schok zins nicht widir gekaufen adir vnse Erbin so sullen is vnse brudere hann(us) adir hug ad(ir) vnse
vettern widir kaufen mit alle dem rechten als wir selbir czu eyme geczugnisse vnd vestenunge der vorbeschriben rede habe wir vorbenater dytherich
gehangen vnse Ingesigele an disen offen brif vnd habin gebeten vnsen herren den komathawer vmme daz Ingesigel des hauses an komathaw vnd han
gebeten vnse brudere hannuse vnd huge vmme ir Ingesigele daz sy dy habin gehangen an eynem geczugnisse an disen gegenwertigen brif d(er) ist gegebin
noch cristi geburte dryzenhundirt iar in dem Nu(e)n vnd funfczigsten iare an sente margareten tage d(er) heyligen Juncvrawen