Wir Nykel Tannenberg(er) Hennel syn bruder Nykel vnd Waltman yr swest(er)sone bekennen offenlich an dem keginwortige(n) brife
allen dy yn ansehen adir horen lesen das wir globit habin vnd globin mit gesampt hant mit dem keginwortigen bri
fe bey vnsern eyrn vnd guten truwen an alle argelist den yrsammen vnd geystlichen herren hern Rudolffen von
honburg lantkompt(ur) czu Bemen vnd czu Merhern vnd dem gemeynen conuent czu kumotow das wir sy schullen lasen
wissen vnd yn kynt tun von desym keginwortigen tage vber drey jar vor dem selben tage byr wochen alsyn drey jar schol
syn das dy gebruder Berchtold Wenczlab Thomel vnd Hennel genant von pesawicz adir sy selber widerkaufen das
erbe dor vber wir yre brif habin vnd schullen sy vnderwysen des brifes bekehntnisse das sy sich mogen dornoch gerich
ten auch vor byr wochen vor den tage als syn drey jar werdin syn vnd nicht andirs das dy rede stet vnd gancz ge
halden werde des habe ich Nykel Tannenberg(er) von mynen wegen vnd auch von mynes bruders Hennels vnd Ny
kels vnd Waltmans myn swest(er)sone wegen dy keyn jngesigele nicht enhabin myn jngesigel czu geczeugnisse gehangen
an den keginwortigen offenbrif Gegebin vnd geschien noch gotis geburte druczenhundert jar an dem eyn vnd sechczic
gesten jare an dem suntage czu latin genant circumcisio domini