Wir Ludwyg von gottes genaden kunig zw Behem Marggraue zw Merhern Herczog in der Slesien vnnd Luczemburg vnnd Marggraue der Lwsicz (etc.) Bekennen offenlich mit diesem brieff vor
allermeniclich Das wir mit gutem Rate vnser Reten vnnd lieben getrewen die Man Stet vnnd alle Inwoner vnsers kreis Elbogen vnser lieben getrewen des kuniglichen
Bern vnnd stewer gefreiet haben nach lewt vnnd außweißung ains brieffs den wir In doruber gegeben haben Vnnd vmb solch freihait Sie ains Dreiczehenhundert Schock geben
sollen das andere gult vnnd nuczung zw vnserm Sloß Elbogen gekaufft mochten werden Also wurden wir mit den genanten vnsern Reten zw Rate vnnd losen von Albrechtt
Malersicken vnserm Lieben getrewen vnser Sloß hertamberg auch in dem Elbognischen kreis gelegen Das Im dann von vnserm vorfarn kunig Wenczeln loblicher gedechtnus
versetzt was Zw solcher ablosung vns der Edel vnser lieber getrewer Mathes Slik von Lazan her zur weißkirchen Sibenhundert Reinsch gulden gelihen hat vor
verstey also wir die obgemelten Man Stet vnnd Inwoner vnsers kreis Elbogen vmb solch obgenant dreiczehenhundert Schock gross auch zw solcher ablosung gen dem gemelten
Malersicken Das Sie In dorumb sein willen vnnd genug machen vnnd außrichtung thun solten Das Sie dan also getan haben Darumb mit wolbedachtem mute vnd rechter
wissen So sagen wir die egenanten Man Stet vnnd Inwoner des kreis Elbogen selher dreiczehenhundert Schock gross Zzins ledig vnnd los fur vns vnser erben vnnd
nachkumen kunig zw Behem Vnnd haben vns dornach auch mit Rate der mergemelten vnser Rete ains erblichen freymerckes vnnd wechsels vereint vnnd vertragen mit dem
obgenanten Mathes Slicken vnnd seinen vettern (etc.) Also das wir Im hertemberg das Sloß mit aller seiner Zugehorung vnnd Zwaytausent gulden Reinsch der wir sie auff vnserm
Sloß Elbogen vergnugt vnnd verschrieben haben nach außweißung aines brieffs In von vns doruber gegeben vmb Ir Sloß Neydeck liechtenstat vnnd alle hofe pflug gewen dorffer
Teich welde vnnd alle Ire Zugehorung nichts außgesaczt Vnnd vmb die Sibenhundert gulden reinsch die Sie an der losung als obgemelt ist zw hertemberg dargeleihen haben
Gegeben Vnnd solh obgemellt Sloß Neydeck vnnd Liechtenstat mit allen vnnd Iglichen obgenanten Iren gutern vnnd Zugehorungen nichts außgenomen Nun fur vns vnser erben
vnnd nachkumen kunig zw Behem nun zw vnserm Sloß Elbogen geslagen haben vnnd In vnnd mit crafft diß brieffs dorzw slahen Also das das bey solchem obgemelltem
kuniglichen Bern vnnd stewer Nachdem wir die mergenanten vnser Man Stet vnnd Inwoner des kreis Elbogen der gefreit haben dabej vnnd dafur pleiben sol vngeuerde
Mit Vrkundt diß brieffs versigelt mit vnserm kuniglichen anhangenden Insigel Geben zw Prag am Sontag nach der heiligen Aufffart Juncfrawen tag Nach cristi geburt
Dreiczehenhundert vnnd dornach in dem Jaren vnnd Sechtzigsten vnsers Reichs Im funfften Jaren
Ad mandatum
dom(ini) Regis