Ich Brud(er) Růdolff von Honburg alt Landkommentůr von Beheim und Brud(er) Cůnrat alt pfarer zů Commotawic verjehen
und bekenne offenlich an disem brieff allen den die in ansehent und hörent lesen das wir getaidingt haben zwüschent
dem Orden und Brud(er) Lůdegge von Essen Landkommentůr zů Beheim und zů Oest(er)rich und mit Friczschk von Alm=
storff und Niggels sinem brůd(er) für den er do zů male gelopt hat zů gůtingent und dis sache zů vullendent umb
alles das gůt und erbe das sy an gestorben ist von iren brůd(er)n in d(er) mannschafft das zů Commotawic gehört das sy das
dem vorg(enannten) Orden und Brud(er) Lůdegge von Essen Landkommentůr zů Beheim und zů Oest(er)rich zů kauffent hant geben reht
und redelich umb vier hund(er)t schog groz(en) und zwainczig schog und sich des zů vergihen sint all(er) ansprach all(er) brůd(er) von
Almstorff ane alle argelist das sy fürbas me dar umb kain ansprach an den Orden haben sont und dis bekantnůst haben
wir getůn vor dem Erwirdige(n) in got h(er)ren h(er)r(n) Joh(ann) Erczbischopp zů Prag und Legat des heiligen stůles zů Rome
und haben in gebet(en) dis bekantnůst mit uns zů besigeln Wir Joh(ann) von Gots genaden Erczbischopp zů Prag und Legat
des heiligen stůles zů Rome bekenne(n) das dis vorg(enannte) bekantnůst also vor uns(er)n genaden geschehen sint als vorgeschriben
stat und des zů urkund so haben wir unser Infigel mit den iren gehangt an disen offen brieff durch ir baid(er) bette willen
der geben ist zů Prag in uns(er)m hoff do man zalte von Gots geburt dreyczehenhund(er)t jar und aht und sehczig
jar an dem freitag dem nehsten vor sant Jorgen tag