Ich Ott gehaizzen der Schenche von Ried. Ich willehalm von Laizze. vn(d) ich herman ymuan genant. vn(d) min chone
frowe Christein. wir veriehen vn(d) tvn zewizzen. allen den die disen prief ane sehent / lesent / vn(d) ho(e)rent lesen. daz der
Ersame h(er)re Apte heidenrich von Cedlutz. ein hofmarch / vn(d) ein hvs mit bovmgarten mit alle(m) / als ez mit movre vmb
vangen ist. daz weilen Dietriches des Zcherfinges was. daz da leit bei walich p(ro)bstv(m)ben / reht / vn(d) redlich gechovffet hat
vmbe sines Gotes havses gvt. im vn(d) sinem Gotes havse Cedlutz. wid(er) Engeldichen sa(e)lig(en) gedaht(en) h(er)r(n) frideriches svn von
Somerbach / mit gvtlichem willen sines p(r)vder Otten. ze rehtem pvrchreht. vn(d) diente man von dem selben hvse dem Gotes
hovse ze slevnburch aller ia(e)rlich an sanct michahel tage zwelif pfennig wienn(er) mvnze. vn(d) sol der vor genant(e) Apte heidnrich
vn(d) sin zamenunge da ze Cedlutz daz vor genant hvs verchovffen / versetzen / vn(d) geben swem si wellen. vn(d) als wir .e. genant sin
Ich Ott d(er) Schenche von Ried. ich willehalm von Laizze. Ich h(er)man ymuan / vn(d) min chone frowe Christein / wir svln daz .e. ge
nant hovs schermen dem vor genanten apte heidnrichn von Cedlutz vn(d) sinem Gotes hvse. als Landes reht ist. mit solher
bescheidenheit swaz an einem ab ge. daz d(er) oft genant(e) Apte vn(d) sin Gotes hvs / daz avf dem and(er)n hab. Avch sint rehte scherme(r)
des oft genanten hvses / mit samt vns / Engeldich vn(d) sin p(r)vder Ott. nah Landes reht. Dar vb(er) swenn frowe Tonya. oder
swie si mit christen(n) namen genant ist des vor genanten Engeldichs swest(er) zv ir iaren chvmt vn(d) vogtba(e)r wirt. so sol si sich des
vor genanten hvses fvr ziht tvn. vn(d) sol avch in den scherme treten nah Landes rehte. Daz der scherme fvr baz sta(e)te belibe
vn(d) vnz(er)brochen des geben wir dem oft genanten apte heidenrichn von Cedlutz vn(d) siner zamenunge / ze einem vrchvnde
disen prief mit vns(er)n Insigeln v(er)sigelt. Diser redlichen sache sint gezevch. h(er)r fridich d(er) hvestoch. h(er)r winhart der Schifer. Ge
rvnch vn(d) da(e)tze sin p(r)vd(er). Engelbreht d(er) Sla(e)zler. Nycolaus d(er) Chamar(er). Chvnrat vn(d) willehalm h(er)r(n) Radwins svn. Ott d(er)
Chrevtz. Gerlot vn(d) p(er)chtolt sin p(r)vd(er). fridich Govzrab. Rvdolf Chlosn(er). Arnolt. Ott hvt. Gebhart. Abram / Seifrid d(er) Schrab(er)
Grindolt. Levbel d(er) smid. friderich hetzman. Lewtvin d(er) Schrib(er). vn(d) and(er) Ersame levte. die da bei gewesen sint. Ditz ist
geschehen ze slevnbvrch chlost(er)s halbe. do von Christ gebvrt ergangen sint. Tovsent. iar. In dem drev hvndristem
iar. ze mitter vasten.