In nomine sancte et indiuidue Trinitatis feliciter Amen. Sigismundus diuina fauente clemencia Romanorum Imperator semper Augustus ac Hungarie Bohemie Dalmacie Croacie et cetera Rex. Ad perpetuam rei memoriam. Quamuis ex debito suscepti regiminis et ex innata nobis clemencia ad omnium et singulorum subditorum nostrorum et presertim ecclesiasticarum personarum statum pacificum et quietum paternis affectibus intendere et eorum iura libertates et priuilegia ipsis a predecessoribus nostris Romanorum et Bohemie Regibus et Imperatoribus indulta et concessa necnon eorum possessiones et bona quecumque graciose confirmare et innouare teneamur. Tamen ad illos propensiori fauore et ampliori gracia nos decet respicere quos ad id eorum merita et obsequia nobis et sacro Romano Imperio ac regno nostro Bohemie prestita et impensa reddunt commendatos. Hinc est quod nos attendentes grata et accepta seruicia que dilectus noster deuotus frater Iohannes Abbas monasterii Brewnouiensis ordinis sancti Benedicti prope Pragam nobis et sacro Romano Imperio ac regno nostro Bohemie multipliciter impendit et in futurum impendere poterit et debebit. Volentes ipsum et suum monasterium predictum ac eiusdem monasterii fratres et conuentum pro tempore existentes in eorum iuribus libertatibus et priuilegiis ac possessionibus et bonis quibuscumque graciose confouere et in eorum iustis peticionibus exaudire. Eapropter ad ipsius Abbatis et conuentus humilem supplicacionem omnia et singula priuilegia libertates et iura ipsis et eorum monasterio a predecessoribus nostris Romanorum et Bohemie Regibus et Imperatoribus indulta et concessa necnon omnes et singulas possessiones et bona quecumque ipsis et eorum monasterio a quibuscumque personis donata et concessa ac eciam per ipsos empta et acquisita prout in ipsis priuilegiis et litteris desuper confectis plenius continetur. De certa nostra sciencia et de plenitudine nostre imperialis et regie potestatis approbamus ratificamus et de nouo confirmamus. Decernentes et statuentes quod omnia et singula priuilegia libertates et iura predicta necnon omnes et singule possessiones et bona predicta ipsis et eorum monasterio in omnibus et singulis suis punctis clausulis et articulis inuiolabiliter obseruentur. Et quod nullus cuiuscumque status gradus uel condicionis existat ipsos in eorum iuribus libertatibus et priuilegiis ac possessionibus et bonis predictis impedire perturbare uel molestare presumat sub pena indignacionis nostre grauissime et amissionis omnium bonorum suorum. In cuius rei testimonium presentes litteras fieri et sigillo nostro imperiali iussimus communiri. Datum Prage anno domini millesimo quadringentesimo tricesimo sexto indiccione nona decimo kalendas octobris regnorum nostrorum anno Hungarie et cetera quinquagesimo Romanorum uero vicesimo sexto Bohemie uero decimo septimo.