Wir Ferdinand der Dritte von Gottes gnaden Erwehlter Römischer Kayser,
zu allen Zeiten Mehrer des Reichs in Germanien, zu Hungarn, Beheimb, Dalmatien, Croatien, vnnd Sclauonien (etc) König, Ertzhertzog zu Osterreich,
Marggraff zu Mähren, Hertzog zu Lutzenburg, vnd in Schlesien, vnd Marggraff zu Laußnitz (etc). Bekennen offentlich mit disem Brieff, Vnd thun kundt allermeniglich, Demnach Vnser Würdiger, Vnser Andächtiger Vnd lieber getrewer Frater Augustin Seifferdt gewester Coadjutor des Vnlangst abgeleibten Alexij Hübners Abbtens des Heiligen Benedictiner
Ordens zur Brawna in Vnserm ErbKünigreich Böheimb gesessenes, Zuuernemben geben, wie das bey erfolgtem absterben erwehntes Alexy Hübners von denen Geistlichen Ordens Brüdern daselbsten
Zur Brawna rité et Canonicé nach seines Heiligen Ordens institution zum Abbten erwehlt, installirt vnd eingesetzet worden were: Vnns dahero demütigst bittendt, Wir Ihne als Abbten des Stiffts Vnd Closters Brawna allergnedigst hier Confirmirn Vnd hier bestättigen geruhen wolten. Wann Wir dann gnedigst angesehen solche eine demütige zimbliche bitt, Vnd darauff gnedigst gewilliget. Als
habenn Wir obige eine zum Abbten zur Brawna Vorgenommene Wahl hiemit in Kayser: Vnd Künigl(ichen) gnaden ratificirt vnd bestättiget, ratificirn Vnd bestättigen auch dieselben auß habender Macht
Vnd Vollkommenheit, als Regierender Künig zur Böheimb, Vnd Oberster auch Erbherr mehrgedachtes Stiffts Brawna, hiemit Vnd crafft dises briefs. Vnd gebieten
hierauff allen Vnd ieden Vnsern Vnderthanen, Was Würden, Standts, Ambts, oder Wesens die in Vnserm Erbkünigreich Böheimb sein, insonderheit aber dem Ordinario Loci,
Vnd denen zu disem Stifft gehörigen Vnderthanen, oder sonst Vndergebenen, Wie auch an den Iudaeis menniglich, daß sie offtgedachten Neuwerwehlten Abbten zur Brawna fratrem
Augustinum Seifferdt, Vnd das gantze Conuent erstberührtes Stiffts bey solcher beschehener Wahl, Vnnd diser Vnserer hierüber erfolgten gnedigsten bestättigung geruhiglich
Verbleiben lassen, darwider nit thun, noch auch die zur offtgemelten Stifft gehörige Vnderthanen, Ihme Abbten, Vnd dem Conuent allen schuldigen gehorsamb zulaisten, Verhindern,
oder jnen in etwas beirren, weder das andere zuthun Verstatten, sondern sich gegen Ihme (gleich Wie gegen einem Voreltern) als Abbten zur Brawna, Verhalten, Vnd von
Ihme für allen ihme Von Rechts oder gewonheit wegen, bey denen Landtägen, Zusammenkünfften, Küniglichen Landtafel, Vnd andern gebürenden, Sessionen, Würden,
Vnnd Gerechtigkeiten Vnwigerlich admittirn Vnd zulaßen, darfür erkennen, ehren, Vnd halten sollen, bey Vermeidung Vnserer schweren Straff Vnd Vngnad, das Mainen
Wir ernstlich. Zu Vrkundt dises briefs besiegelt mit Vnserm Kayser: Vnnd Küniglichen anhangendem grössern Insigel, der Geben in Vnser
Statt Wien den drey Vnnd zwantzigsten Monats Tag Aprilis, nach Christi Vnsers lieben Herrn Vnd Seeligmachers gnadenreichen Geburth, im Sechs
zehenhundert, Zwey Vnnd funfftzigsten, Vnsers Reichs des Römischen im Sechtzehenden, des Hungarischen im Siben Vnd Zwantzigsten, Vnd des Böhmischen im fünff Vnd Zwantzigsten.
Ad Mandatum Sac(rae) Cae(sareae)
Majestatis proprium (etc)