In nomine domini amen. Cum ea que aguntur in tempore ne simul cum tempore labantur, solent litterarum testimonio perhennari.
Nos Eberhardus de Vylnanycz ac heredes nostri ad universorum Christi fidelium tam presencium quam futurorum noticiam cupimus devenire,
recognoscentes et profitentes in hiis scriptis, quod deliberacione diligenti prehabita, de consilio et consensu omnium amicorum nostrorum pro remedio peccatorum
nostrorum et parentum nostrorum defunctorum necnon et heredum nostrorum presencium et futurorum fratribus monasterii sancte Marie in Valle Virginum unam
sexagenam in villa dicta Vylnanycz cum incole ibi residentibus videlicet duobus layconibus nomine Symonem, Iohannem et resignamus
ac donasse et resignasse nos recognoscimus pro nobis et nostris heredibus, ita quod dicti fratres unam mediam sexagenam grossorum Pragensium in anniversariis parentum
nostrorum infra scriptorum in pitancias eorum expendere tenebuntur et vigilias cum missa defunctorum. Videlicet in festo assumpcionis pro avia nostra, in
festivitate purificacionis pro matre nostra, in festo sancti Thome pro avo nostro, in festo sancti Iohannis et Margarethe pro
patre nostro, in festo sancti Martini pro fratre nostro Iohanne et infra quamlibet septimanam duas missas, unam de beata virgine, aliam de sancto
Spiritu. Sed mediam sexagenam ad utilitatem eiusdem monasterii convertentes. Sic quod predictus census debet exigi divisim, videlicet
media sexagena in festo sancti Georgii et media in festo Galli temporibus perpetuis duraturis. Tali eciam condicione interposita, quod si heredes nostri aliqua
causa et utilitate eorum eundem censum pecunie qualicunque loco eque certo assignare poterunt, dicti fratres debent esse contenti et pacati. In
cuius donacionis, resignacionis ac eciam ordinacionis robur et firmamentum presens scriptum presentibus litteris infra scriptis sigillis ordinavimus
muniri, videlicet sigillo nostro ac sigillis generosorum Iohannis de Bazant et Nicolai nostrorum filiorum necnon et sigillis domini Petri de Zidicz et Nicolai
de Miezny generis nostri, per eos ^3w^ eandem testes existunt utpote ad hoc specialiter vocati, specialiter et rogati. Actum
et datum in Vylnanycz anno domini ^3w^ trecentesimo sexagesimo sexto, die duodecima mensis Aprilis.