Ich bruder Johanes hiltprant an der czeit Gardian vnd ich bruder fridreich in der czeit lesmeister vnd Ich vicze gardian vnd der gancz
Couente gemeincleich der mynnern brüder sant franciscus ordens des klosters czu Eger Bekennen mit dem offen brife allen den die In
sehen oder horn lesen das vns die Ersame fraw margret aingelin an der czeit burgeryn czu Eger mit gutem wolbedachtem mute
vnd bei lebendigem leibe gesthaffet vnd gesthiket hat gote czu lobe vnd der Juncfrawen maria czu eren vnd den hernachgenten
seln cztroste czu einem ewigen selgeret Ite auf des puchners haws an der sthule czehen alt meysner groschn vnd czwu hennen
Ite auf der els seilerin hawse hinden an des puchners haws drey meysner vnd czwu hennen vnd auf des endres koche haws vnten
an der seilerin haws auch czehen meysner vnd czwu hennen Ite auf des peczoldes haws vnten an des koche haws das der francz
sneider in gestant ist auch czehen meysner vnd czwu hennen also das wir alle Jar ierleich vnd ewigcleich ye am nehsten tage nach
dem achten des obirsten nach irem tode schüllen vnd wöllen halden vnd begeen ein iarczeit mit vigilien selmesse vnd leichczeichen
mit vnser an aufgestekten prynhenden kerczen vnd vor dem volke offentleich in vnser kirchen alle Sontag vnd ander heilige tag
eibigcleich czugedenken so man ander seln pfligt czugedenken margret aingelin peter aingels seligen irs wirts ~Niclas~ aingels
gels irs suns Anna smidlin irer tochter wenne die vstheidet Rudiger aingels albrecht aingels margreten seiner wirtin ny-
clas aingels franczen aingels hanns aingels seins sons vnd aber hannsen aingels vnd barbaran seiner wirtin Burgharten
pürkels Annan schnigeryn Niclas pürkels hannsen pürkels michel pürkels vnd des ganczen geslechts Vnd wenne wir ob-
genanten brüder also die benanten Jarczeit begeen So sthol man vns brud(er)n vnd couent die obgenanten hüner czins antbortn
czukoch(e)n den Couencz brud(er)n Jungen vnd alten czu eyner pitanczen als wir die Jarczeit habn vnd dieselbn geltczins das sint die
drey vnd dreyssig meysner alles alter freiburger grosthen die sthol man vns Couencz brud(er)n auf den tag in die hant gebn vnd teiln
als irre das gereicht mag ongende Vnd des obgenanten selgeret sthol ein nemer vnd ein ausrichter sein die obgenant mar-
greth aingelin Vnd weme sie den brife noch irem tode bevilhet vnd eingibt vnd in czukünftigen czeiten Innehat vnd weyset der sol
des obgenanten selgeret mechtig sein vnd ausrichten in aller masse vnd weyse als die obgenant margret aingelin selbs gewest ist
Vnd das sthol also eibigcleichen gehalden werden on allen abgank vnd die obgenanten czins sthol man auch bey dem obgenanten
selgeret eibigcleichen vnüruckt lasen bleiben in alle dem rechten als die von alters auf die egenanten margreten aingelin komen
sind Vnd die nicht höhen noch steigen denne in sülcher weise als oben geschribn stet Vnd wenne auch sach were ob geschee das wir
obgenanten brüder vnd couente der obgenanten Jarczeit vnd gedechtniss nicht enpülden vnd doran seümig wurden des gote
nicht enwölle Wer danne des benanten selgeret ein vorsteer fürnünde ist der sthol vollen gebalt vnd macht haben die obgenten
czins heben vnd tun czu der czeit wo er will durch goteswillen on alle hinderniss als ofte des notgeschee on alle wider ansprüch on
alles geuerde Das ditz alles stete vnd gancz eibigcleich vnprüchleichen gehalden werde So haben wir obgenanter Gardian vnd co-
uente sant franciscus ordens czu Eger für vns vnd alle vnser nachkomen vnsere Insigell mit gutem willen vnd wissen gehangn
an den brife Der geben ist Von Cristes gebürte czale virczehenhundert Jare Vnd dornach in dem czwey vnd czweinczigsten iare
des nehsten donerstags vor kathedra Sancti petri