Wir burgermeister vnd Rate der Stat zu Eger Bekennen offenlich an disem brife vor allen den die In sehen horen aber
lesen Wann fur vns in vnsern Rate komen sein Niclas Slik vnser Ratsgenoss vnd vlrich hofmeister auch vnser ge
sworner zu den zeitten vnd haben fur vns gelaiwttent vnd dorauff erbeist als recht ist daz Inen In wol gelaubn
wie das katherina die Torflin vnser mitburgeryn der got gnad in letzehaffter cranckheyt Irs leybs nach In ge
sundt vnd mit wolbedachten mute vnd redlicher vernunfft In Ir letztes gescheffte in einem verslossen zedel
gegeben hat vnd das hebt sich also ane Ich katherina die Steffan Torflin hab mein letztes gescheffte mit disem
zedel getan vnd bestallt daz nach meiner verschaidunge tzuhalten als hernach geschriben stet Item tzun ersten schick
vnd schaff ich hie zu Eger zu der pfarre zu den parfüssen prudern vnd zu den predigern in yglichen der dreyer
orden einen guldein ebigs tzinss vnd drumb sullen sy mich vnd meinen man selligen alle Jar Järlich vnd ebliclich
mit vigilien des abends vnd des morgens mit Selmessen begeen vnd vnser auch alle heilige tage gedencken als dann
gewonlich ist wenn aber das versawmpt wurde So sullen meine furmunden macht haben tzu pfenden in der ba
awsen ye vmb drey schilling gr(oschen) in welchem orden daz nicht geschech als offt vnd sich daz dann gepurt vnd die
vorbenan(ten) drey gulden ewigs zinss in die drey orden sal mein vetter pauls meurl ewigen in dreyen Jaren
aber vieren nach meiner verschaidunge wenn er mag vnd sal in der tzeit dorauf nicht gedrungen werden
doch sal er dennoch alle Jar dy weyle er sulcher gulden nicht geewigt hat in yglichen orden einen gulden
geben das daz gehalten vnd volbracht werde als oben geschriben stet vnd des sullen auch meine furmund
von Jglichem orden einen guten brief nemen Item ich schick meins bruder kint ludmilla funfftzig guld(en)
vnd allen meine hawsrate kainerlay aussmacht aussgenomed noch hindan gesatzt vnd auch die guter tzu
Seyssen vnd dy tzwayhundert vngrisch gulden dy dann tzu der ewigen messe gehoren das dasselbe meins
bruder kint die ewigen messe dauon halden vnd bestellen sal nach lawtt des gescheft brifs als dann d(er)
peter lawtenslaher selliger das gestifft hat vnd Ich beuilhe daz benante meins bruder kint ludmilla
meins vettern pauls daz er das bey Im habn vnd das zihn vnd seins guts mechtig sein vnd doch dem
kinde sein gut vorschriben vnd auf seinem haws vermachn sal das daz kint nun des zu sinen Jaren kome des
seinen gewys wer vnd wenn daz kindt tzu seinen tagen kumpt So sal mein vetter pauls vnd auch dy her
nachbenan(ten) meine furmunden daz kindt aussrichten vnd daz der schickn vnd aussgeben als Ich In getraw
vnd glaub sturbe aber daz kint ab ee es zu seine tagen kome So sal mein vetter pauls des kinds hab gebn
zu steyern vnd zu wegen vnd durch meiner sele sellikeit willen wo das am bestn vnd nutzistn sein wirdt
vnd sal daz thun mit wissen meiner furmund Er sal auch daz kint mit aller sachn gen der Stat selbs
verantw(urten) vnd dem kinde drumb nichts ab slahen on freude Item ich schick meins vettern pauls kinden d(em)
Jobste funfftzig gulden vnd der Magdalen dreyffig gulden sturben aber dy kinder ab ee sy zu Irn tagen
komen So solde daz gelt auf Iren vater meinen vetter pauls tretn vnd ge fallen vnd den kinden sal
das gelt auf seins haws bleibn vnd In drauf verbriefft vnd vermacht werdn bis daz sy tzu Irn tagen
komen vnd ab der pauls ee abginge wenn dy kinder So sal das gelt den kinden allen tzu nutz komen
vnd nicht der frawen Item ich schicke der alden statschreiberin meins harrussen mantil vnd acht
gulden an dem daz sy mir vor schuldig ist Item die pfant dy ich Innehab von der Steinweychin
nenlich ein pette tzway leylach vnd ein padpeck fur funff guld(en) daz sal man Ir vmb funff guld(en)
gebn Item der Endlein meiner mome dy bey den ballan Jgud ist schick ich vir guld(en) Item der Endlein
dy Jgud bey dem delinger ist siben guld(en) Item meiner momen der Trawtnerin am Spitalperg vir
guld(en) It(em) der leb ferberin vier guld(en) meins peychtuat(er) eins guld(en) vnd der weny heinzlein ein guld(en)
It(em) ich bestelle vnd schick zu furmunden ditz meins geschefts das tzuhaltn vnd ausszuerichtn als obn
geschr(iben) stet meinen vettern pauls Mewrl den Steinley vom Elbogen vnd den Nikel bey der stat
den ich des dann sunderlich vor andrn getraw vnd glaub ditz geschefte ist gescheen an donerstag
nach pauli conuersion(is) Anno et(c) xxx(mo) vnd wir obgenan(ten) burgmeister vnd Rate haben ge
heyssen den obgenan(ten) Nikel Slik vnd peter clopffer vns(er) frewnd vnd Ratsgenossn das dy ba
vnser geheyss wegn des obgeschr(iben) geschefts tzugetzewkniss Ir an schaden Ire Insigel an
disen brif gehangen habn der geben ist am donerstage nach des heyligen creutzs tag Inuen
tionis Nach cristi geburt virtzenhundert vnd In dreyssigsten Jare