Ich Bernhardin Gindel Burger zw Eger Bekenn in disem meinem offen brieff vor allen den die In sehen ader horen lesen Das ich mit guter vernunfft vnd mit Rate vnd wissen meiner freuntschafft Got dem almechtigen zw lobe vnd
~der~ der hochgelobten Junckfrawen Marien vnd allen himelischen Heer vnd mein meiner Eltern vnd Hausfrawen Selen zw hilff vnd trost auff meine hernachgenante vier erbe die bey der Stat ligen Nemlich die langewiesen
die vnter losaw ligt oberhalb des Taubenhaws der ist ainsstehalb tagwerck die das alten weysen gewalt ist Ader auff zwelff morgen ackers vnd wismat gelegen zwischen der Hentzshen Haws acker vnd des Albrecht
Ketzels wiesen das ich von Langperger kaufft hab vnd von Endres Kessler geschwenckt mer auff den acker bey den holtzn der des Ketzels gewesen ist funff morgen stost oben an des Zunckharts der mir zw meiner
Hausfrawen der got genedig sey worden ist vnd auf mein Haws Garten vnd Stadel das beyenander ligt vor dem Obertor bey der Nonnen Hof stost hinden an des Zunharts vnd Ketzels vnd ander heuser vnd geet hinden
an die gass bey der Nonnen thurn alles freis Aigens ledig vnd frey auf die vier obgenanten erbe vnd guter Ich mit gutem freiem willen verschreib vnd gib Zwaintzig gulden Remisch zw ainer ewigen mess
die nach meinem tode durch meine furmunde meins gescheffts auf die obgemelten Zwaintzig gulden sol aufgericht werden In Sant Claren kirchen allhie zw Eger aber in der pfarr wohin mein geschefft anzaigung geben wirt
vnd die obgeschriben erbguter alle viere sullen nicht voneinander verkaufft versetzt noch verlaufft werden von kainen meiner erben freunde noch frembde Bisslang die Zwaintzig gulden vmb vierhundert gulden remisch
abgelost werden Auch sol nymant Innhaber der obgenanten vier guter die weitter noch verrer nit versetzen noch kain gelt dorauff nemen vnd wo das beschee das sol kain crafft haben vnd ain Erber Rate vnd die Zwen
furmunde mugen alsdann sulch vierhundert gulden von In fordern vnd dorzw bringen das sulchs abgelost werden Vnd sulcher Zwaintzig gulden sullen allweg die zwen furmunde von eym Rate zw vnserm Holtzgarten verordent
eynnemer sein So dann die mess von mein furmunden aufgericht wirt So sol dann derselben mess mein Bruder vnd vnsere Sun vnd menliche enicklein vnsers namens lehenhern sein doch ainen fromen Priester do ain Rate
am gefallen anhat Man sol auch die mess kainen Priester lenger verleyhen denn von Jar zw Jar So Sie aber ain Priester etliche Jar Innen Hett solang das er alt vnd kranck wurde vnd nymmer mess Halten mocht So sol
man In seiner lengen durfft alters vnd swachhait genyssen lassen Vnd In dar nicht nemen dieweil Er lebt Doch das er dennoch etlich mess alle wochen bestelle das dennoch fur die hoben Selen gebeten werde Vnd die Zins
sollen allweg antzay Halp walpurgis vnd Halp michahelis so sol man Sie den obgemelten furmunden allweg vnd zw ider zeit raichen vnd geben wer die vier obgenanten guter Inne hat So sollen es dann die furmunde weitter dem
Priester raichen Vnd allweg fur vnd fur also gehalten werden sol Vnd ab sach wer das die Innhaber der obgeschriben guter an sulchen Zinsen zw ider frist als offt das not geschee Inzinsen sewmig wurden So mugen
die gegeben furmunde von eimem Rate auss aigner macht vnd vollen gewalt on alles recht vnd on gerichts hilff durch Sie selbs ader durch Ire Boten machticlich macht haben dauf den vier obgemelten erben vnd gutern
ober auf ainen wie Sie wellen zupfenden ader pfenden lassen Bissolang Sie des obgeschriben zins dauon bekomen mugen on allen Iren schaden als ander erbzins recht vnd gewonhait ist Doran sol In nymant kain
hindernus thun weder freunde noch frembde auch nymant dorwidder kain behelff nit suchen wie manchen syn erdencken mocht trewlich on als geverde So aber die Innhaber der vier obgenanten guter sulch Zwaintzig
gulden vmb vierhundert gulden ablosen wolten das ain ider Innhaber der guter macht haben sol zw yder frist wie obenstet das doch nicht neher sein sol denn vmb vierhundert guld so sol man es den furmunden
vor ein Halbs Jar ansagen Vnd allweg ein Rat allhie zw Eger des gelts eynnemer sein Vnd alsdann die ablosung thun mit den verfessen zinsen vnd sulch gellt vierhundert gulden sol dornach noch ains Erbern Rats
Rat vnd meins Bruders ader der nechsten freunde wider vmb Zwaintzig gulden angelegt werden vnd ein gnugsame verschreibung doruber nemen dieselben verschreibung sol in die laden geleyt werden do die andern
brief ober vnser Selgeret Inne ligen bey ainem Rat Auf das die mess also fur vnd fur ewiglich gehalten werde Vnd so es aber der almechtig got schickt das mein Bruder vnd vnser Sun vnd menliche Enicklein mit tode
abgingen So sol dornach sulcher mess mein heb herr ain Erber Rat ewiclich Lehenhern sein vnd bleiben vnd die gegeben furmund hernach von eim Rat sullen sulcher mess vorsteer vnd aufseher sein das Sie dester redlicher
vnd ewiglich despas gehalten werde Dorauff Bit ich mein heb hern ain Erbern Rate sulcher meiner mess vnd andern vnsern Selgereten wie In vertraut haben trewlichen vnd vleissiclichen furzuseen Als ich des
vnd alles ein gantzen getrawen vnd glauben auf Sie setz Doran sol In nymant kainer meiner freunde noch frembd noch nymant von mein vnd Iren wegen wider nit recht zaigen veruntlich noch on recht gantz in
kainerweis kain einrede noch hindernus thun trewlich on als geverde Des zw war urkund Han Ich obgenanter Bernhardin Gindell fur mich all mein erben vnd nachkomen mein aigen angeboren Insigel an den brif
gehangen Vnd Han dorzw gebeten meinen Lieben Bruder Jobsten Gindell auch meine liebe vettern vnd Swa~g~ Wolffn Gindell vnd Jorgen Daniel das Sie Ir Insigell von meiner bete wegen des Zugaicznus In
Iren erben vnd Insigeln on schaden zw dem mein an den brif gehangen Haben Der geben ist am donerstag nach dem Ascher mitwoch Nach Cristi geburt funfftzehenhundert vnd Im Vierden Jare