Wir bruder Lorentz obberster Spitalmaister, bruder Peter der prior vnd bruder Got
frid kelnermaister, vnd der Conuent gemain der Creuzger mit dem Stern Sanct Augustin
ordens des haws vnd des Spitals zu prage In der grossn Stat an der pruckn, bekennen vnd
thun kundt offenlich mit disem brieff, allen den die In sehen ader horen lesn, das der Erbar
man Conrad der plick von fronaw vnd sein Erben vns vnd dem ordn habn gebn, vnd mit
beraitn gelte genuczlich bezalt Sechczigk phock grossen Behmischer vnd pragischer guter
pfenning, die wir an vnser vorbenant haws vnd Spital vnd des ordens nutz, eern vnd fromen
gelegt habn vnd gekert, dorumb gelobn wir bey vnsernn rechtn trewen, vnd mit disem brieff
fur vns vnd vnser nachkomen, vnd sonderlich an vnsers ordens stadt, vnd von seynen wegen
alle Iar teglichen ein ewige Mes zu lesn In vnser pharrn zu konigspergk auff Sanct Michaels
altar vnd die Messe phollen vnd wollen wir mit liechtn vnd mit allen andern gerath, das zu
eyner messe gehort fertign vnd berichn an allen iren schadn, vnd der obgenantn pharrn an
allen entgelt, als gottes dinsts der do vntz hero ist geschehn vnd vorrecht do wesen phol
dem Erbarn Peter von Schaln vnd sein Erbn zu eyner pesserung fur des selbn Peters son
den Vlrich, Wurde aber vns die pharr abgedrungen vnd wurden des entwerdt wie das
geschehe, das got nicht wolle ader In welcher weis ader wesawmung die messe nicht wur
de volbracht als vorgeschribn steht, vnd als wir gelobt habn, So phollen wir ader vnser
nachkomen vnd der ordn den hernach geshribn viren, dem Edeln herrn Albrecht Nothafft
von Tierskyn, herrn Trost dem winkler von konigspergk, herrn Engelhardt dem wilden
vnd heinrich von holorut Iungern eyn Erbe, ader wer disen brieff Innn hat vnd weist, die ob
geshribn sechczigk phock grossen behmischer vnd pragischer guter pfenning wider gebn, vnd
mit beraitn gelte wider bezaln vnuerzogentlich dornach In acht Wochn, wenne wir ader
vnser nachkomen ader orden dorumb vormanet werden, von den obgenantn viren ader von
dem der disen brieff Innn hat vnd weist, vnd die selbign vier ader der eyne der disen brieff
Innn hat phollen vmb das offt benant gelt wider fromen ein ewige Messe vnd stifftn
Wurde aber das obgeshribn gelt nicht bezalt von vns ader von vnsern nachkomen ader von
dem ordn In der frist vnd als vorgeschribn stet, allen den schadn den dan die offt benantn
vier ader der eyne der disen brieff Innnhat nemen ader genomen habn an Iuden an Christen
ader In welchn sie des offt benantn gelts schadn dan empfahnt ader empfangn habn
den sie mit schlechtn wortn on ayde benennen ader mit piderbern bewysn mugen, den
phollen wir ader vnser nachkomen vnd der ordn, In den viern ader dem der disen brieff Innehat
mit sampt dem hawptgelt genzlich richtn vnd abethun vngeuerlich, Geschehe aber das nicht
so pholln vnd mugen dan die obbenantn vier ader der eyn der disen brieff dan Innehat
vns vnser nachkomen vnd den ordn auff haldn vnd pfenden an vns selbs ader an sein vnd
des ordens gutern wo wir die habn In behmerland ad anderswo, vnd doran pholln wir
noch vnser nachkomen noch der ordn noch nymandt von vnsern wegn noch von des ordens
wegn, sie noch kayner Irer frewnd ader helffer nichts hindern noch krenkn mit wortn noch
mit werckn, mit gaistlichm rechtn noch mit weltlichm gerichtn ader rechtn, mit aygen ader
kaynes herrn gewalt, wir gelobn auch pey vnsern rechtn trewen fur vns fur vnser nach
komen vnd fur den ordn ab diser brieff an den Insigeln ader an keynerlay andern sachn, vil
ader wenigk gekrenckt ader zubrochn wurde wo von das geschehe, das In das an der Messe
noch an dem gelde kainerlay schadn brengn sol, Sunder es sol alles das vorgeschribn steht
genzlich volbracht werdn vnd ewigklich werdn gehaltn, vnd also bleibn als vorgeschribn
vnd gelobt ist on alle arglist, Vnd dorumb das das alles also stete beleib on vnzubrochn
on alles geverde, Gebn wir In disen offen brieff des zu eyner sichern vrkundt vor
sigelt vnd bestetigt mit vnsern der erst benant bruder lorentz des obberstn Spital
maisters vnd mit des Conuents zu prage anhangendn Insigeln, vnd wir die obbenantn
Bruder peter der prior vnd Bruder Gotfrid der kelnermaister vorpindn vn vorpflichtn