Ich Iller von Zwingendorf. vnd ich Rvedger sein svn. vnd ich Ott sein svn. vnd ich Geisel sein tohter Otten havsfrovv
Albers. vnd ich Jvt sein tohter Otten havsfrovv von Opplaewiz. Wir veriehen offenlichen vnd tven chvnt allen den die disen prief
lesent oder horent lesen. die nv lebent vnd hernach chvnftich sint. Daz wir mit gvetem willen vnd mit zaetigem rat vnser frivnde. vnd
ovch mit ir gvnst. den chrieg den wir haben gehapt mit den prvdern von Oseverperg vmb zwai lehen der ains leit ze harraz. vnd daz ander
in Wunstz. Wand vnser herre Herzog Illbreht von Oestereich vnd die lantherren ertailt habent. vnd ainen satz gesatz habent. swaz
gvetes die gepavren wider ir herren gechavft habent. vnd daz si ovf die gotshavser geben habent. daz sich dez die herren wider vnder
winden. Nv haben wir den selben chrieg den wir haben gehapt vmb dev wirgenanten zwai lehen da ze harraz vnd in Wunstz lazen
dvrch got vnd dvrch vnser sele willen. dem gveten sand Johans vnd den prvedern von Oseverperge. Wand wir si in emalns verchavft
heten reht vnd redlichen da von verzeihen wir vns aller der aigenscheft. vnd allez dez rehtez daz wir daran gehapt haben. vnd geben
dem gvten sand Johans vnd den prvedern von Oseverperge dev wirgenanten zwai lehen da ze harraz vnd in Wunstz zv rehtem aigen.
wand si vnser reht aigen gewesen sint. vnd zv allem dem reht als wir si e in gewalt vnd in aigenscheft gewer haben gehapt ledi
chlichen vnd vreilichen ze haben. vnd allen ir vrvmen damit zeschaffen. verchavfen. versetzen. vnd geben swem si wellen. vnd ha
bent vns dar vmb die wirgenanten prveder geben zehen phfvnt wienner phenninge. vnd wand wir selbe niht aigen Jnsigil haben
da von so geben Wir disen prief zv ainem vrchvnde. vnd zv ainem gezivge. vnd zv ainer vestenvnge diser sache ver insigilten mit
vnsers herren Jnsigil hern Livtoldes von Chvnringe. vnd mit seins vetern sigel hern Illbers von Chvnring. Dez sint geziwge.
Fridereich von sevelt. Jeorg der waser. Stephan von Zwingendorf. Dvrinch von Chadoltz. Starchen von harraz. Rvdger hern
Regenwartz svn. Gotfrid sein prveder. vnd Ott sein prveder. vnd ander frvm levtt den disev red chvnt vnd gewizsen ist. Diser
prief ist geben do von Christes gepvrt waren Tavsent iar vnd zwai hvndert iar. in dem sehs vnd Nvnzigistem iar.